Retos matemáticos... e non tanto (III)

Parece que a moitos de vós vaivos isto de romper a cabeza con estas cousas, así que por min que non quede. Tres carameliños en forma de enigmas... a pensar, a pensar!!

Reto1.- Un cego entra nunha tertulia de señoras. Queda un intre á escoita e despois di:
- "Saúdo ás vintecatro damas aquí presentes"
- "Non somos vintecatro - respondeulle unha delas - pero se fósemos cinco veces máis das que somos, seriamos tantas máis das vintecatro como tantas menos somos neste momento."

Cantas señoras había na tertulia?

Reto2.- Todas as camisas dun gardarroupoa son brancas, menos dúas; todas son azuis, menos dúas; todas son rosas, menos dúas.

Cantas camisas hai de cada cor?

Reto 3.- Dous profesores pasean charlando das súas familias:
- "Por certo, - pregunta un - de que idade son as túas tres fillas?"
- "O produto das súas idades é 36, - contesta o outro - e a súa suma, casualmente, é igual ao número da túa casa"
Tras pensar un chisco, o que formulara a pregunta afirma:
- "Fáltame un dato!"
- "É verdade, perdoa! - concede o outro - esquencera dicirche que a maior toca o piano"

Que idades teñen as fillas?

Solucións ao reto anterior:
Reto 1: son siameses
Reto 2: 55 + 5 = 60