Hypatia - Ágora

Estes días foi o agardado preestreo da última película de Alejandro Amenábar, Ágora. Foi unha agradable sorpresa saber que a vida (e morte) da primeira gran matemática da historia ía ser pasada á grande pantalla.
É bastante probable que teña que agardar a que o filme saia en DVD para poder disfrutar del, pero polo historial do director e sendo coñecedor da vida que tivo a protagonista da historia, voume atrever a recomendárvola. Se despois non me convence, prometo tragar as miñas palabras.
Polo de pronto, déixovos o trailer da película e unha breve reseña da biografía de Hypatia.

Hypatia naceu en Alexandría (Exipto) e criouse no culto ambiente desa cidade. O seu pai foi un ilustre filósofo e matemático que traballaba no Museo que non só permitiu que a súa filla estudase Ciencia e Filosofía, senón que foi tamén o seu primeiro mestre. Ela formouse como científica no Museo, do que chegou a ser directora, pero tamén viaxou a Italia e Atenas para recibir cursos de filosofía. Despois dedicouse durante 20 anos a ensinar Matemáticas, Astronomía, Lóxica, Filosofía e Mecánica no Museo. Fíxose famosa por ser a mellor na arte de resolver problemas, tiña tan boa reputación que chegaban estudantes de Europa, África e Asia a escoitar as súas ensinanzas sobre a aritmética de Diofanto.

Tivo unha vida moi prolífica durante a que chegou a escribir 44 libros; ademais, foi unha grande inventora e entre os aparellos que se lle atribúen destacan o astrolabio plano (para medir a posición das estrelas, os planetas e o sol), o aerómetro (para medir líquidos), o destilador de auga ou o planisferio.

Defendeu o heliocentrismo e era unha ardente defensora da cultura pagá, o que lle supuxo a inimizade e o odio dos cristiáns da cidade. Negouse a converterse ao cristianismo e a renunciar ao coñecemento do grego.

Acadou tanta popularidade que un día o bispo Cirilo ao pasar por diante da súacasa viu un gran movemento de xente e, ao preguntar que pasaba, dixéronlle que era a casa de Hypatia e que ela estaba saudando. Algúns autores pensan que esta é a orixe da conspiración que remataría coa súa vida. Na coresma do 415 foi brutalmente asasinada por un cento de encapuchados vestidos de negro. A súa morte marca a fin de Alexandría como centro da matemática antiga.

Sen dúbida, foi a científica máis famosa da antigüidade e a primeira da que a súa vida e obra están documentadas. Cento vinte anos despois da súa morte, Sócrates dixo dela "a beleza, intelixencia e talento desta gran muller foron lendarias, e superou ao seu pai en todos os campos do saber"

"As mulleres nas Matemáticas"
Matilde Ríos Fachal
Baía Edicións