Un home impuntual

Escrito por Pepe Cáccamo e ilustrado por Manuel Pizcueta, Un home impuntual (da editorial Galaxia) é un libro que me encanta, un deses pequenos álbums que xustifican e me reafirman na idea de que este formato non é necesariamente literatura infantil. Con tristura, lemos a desgraciada vida dun home que non é quen de chegar xamais a ningún lugar onde quedara á hora prevista; tan tarde se lle fai sempre que ata a súa morte xoga co seu horario. O pobre seguirá camiñando sen reloxo polas páxinas en branco que poidan quedar no libro mentres o lector poderá pechalo para si chegar puntual a calquera cita posíbel.

Unha reflexión sobre o tempo que nos amarga, sempre suxeitos ao seu mandado, sempre ollándoo de esguello para manter o ritmo de vida que a sociedade actual nos impón. É o reloxo o fundamento da nosa existencia, quen nos guía e nos indica cada actividade?
As ilustracións van en consonancia co texto, dándolle luz "atemporal".
Gustaravos. Garantido.