Vou ter un irmán!!!

Publica Galaxia este álbum ilustrado (por fin!) de María Solar con ilustracións de Xosé Tomás: Vou ter un irmán!!!. Unha entrada que dende aquí vai ir dirixida ao meu colega Anxo porque o seu fillo estase a topar nunha situación semellante, mesmo o nome pode chegar a coincidir!
É un álbum fermoso, tanto polo texto como polas ilustracións, pero paréceme que non ten o acabado que debería; non sei se é debido ao papel -non entendo de edición- pero o resultado final creo que non é o máis axeitado, o que constitúe por si mesmo unha mágoa: poderiamos estar ante un álbum delicioso pero non chega a ser luminoso, non sei se me explico.
A dozura do texto destaca a carón dunhas ilustracións enxeñosas: a chegada dun bebé a unha familia non ten por que ser un trauma para a súa irmá se esta participa do día a día tal como nos sinala o texto.
Parabéns a esta editorial por retomar os álbums, botabamos de menos a colección que comezara con Unha chea de familias que coido mellor editada.