Imagina

Marabilloso álbum sen palabras de Aaron Becker que publica Kokoro, Imagina foi Premio ao mellor libro ilustrado infantil por parte do xornal "The New York Times" e  "Medalla Caldecott" ao ilustrador máis destacado. O libro é unha extraordinaria viaxe á imaxinación, onde unha nena aburrida ante o incansable quefaceres dos maiores, colle o seu lapis vermello para debuxar unha porta pola que poder entrar. Aquí comeza o seu periplo que a levará a lugares con castelos, artefactos que voan, gaiolas, e máis lapis. Porque será este lapis o protagonista esencial da historia, ese que é quen de debuxar unha nova realidade. Todo é fantástico: a composición, a perspectiva, a cantidade de referencias, as cores, a historia, a intriga, o ritmos... Abrir o libro é botarse a voar, desexar posuír ese lapis vermello para comezar nós tamén esas miles de viaxes que, tantas veces, a nosa vida adulta esquece por falta de tempo. Pechemos os ollos con cada páxina e constrúamos un mundo noso polo que poder andar de cando en vez. Ben nos cómpre.

Un libro que resulta estrañamente imperativo. Unha delicia que hai que posuír. Como o noso propio maxín.