Unha longa viaxe

Tan pronto ollas a portada sabes que che agarda un libro magnífico. Nela están os dous protagonistas paralelos da historia, e sospeitas que agarda. Tamén coa portada sabemos que dentro imos rebordar de sensibilidade e sentimentos. Tal como sucede. Porque primeiro apértalo, úlelo, e logo pasas a lelo inmediatamente, non podes esperar máis. E as ilustracións de Federico Delicado posúente. Case podes adiviñar o texto de Daniel H. Chambers. Ambos realizan unha comuñón perfecta. Unha longa viaxe é, si, o testemuño dunha realidade que millóns de persoas viven cada día e que preferimos esquecer unha e outra vez porque é máis doado vivir entre os noso soños e o noso mundo doado. Para que botar a ollada tan alá? Por iso sempre son tan importantes estes libros: para nos lembrar unha e outra vez que calquera podería vivir esa mesma situación, e que aquí xa a vivimos aínda non hai tanto tempo. Que debemos tender unha man e non agochala. Que somos máis xenerosos cos animais que cos nosos conxéneres. Que o noso egoísmo non ten límites. Que as fronteiras marcámolas sen necesidade da súa existencia.

Grazas, Kalandraka.