Firmin

Máis de seis meses levaba o libro agardando a miña lectura e eu non me decidía. Si, comprobaba nos blogues amigos que todos o recomendaban e unha primeira aproximación (apenas 30 páxinas) recomendáronme distancia. O verán, coma sempre, regaloume tempo e, por fin, decindinme. E, tal como me temía, o libro defraudoume. Non sei se o feito de ser unha rata, ou un rato, como afirman algúns lectores, ten algo que ver, pero por moito que este animal sexa culto e ame a literatura, o libro non me chega. Podemos ver un animal sensible e moi humano, e de aí a súa soidade, rasgo característico da nosa sociedade "humana"; si, cita libros e lecturas, pero tampouco se inmisce neles nin nos dá demasiada información sobre esa literatura, é dicir, gústalle ler, e punto. Tamén lle gusta o cine porno! (como bo humano) En fin, síntome un pouco rara porque só oín boas críticas e marabillas enxalzatorias, pero teño que recoñecer de novo que constituíu unha decepción para min. Nalgún sitio lin advertencias para os lacrimóxenos; eu, que o son, non sentín en ningún momento ganas de chorar, nin de rir a gargalladas, aclaro. Será que agardaba máis. Ou que está sobrevalorada. De todos os xeitos, invítovos a lela para que vós me digades a vosa opinión, xa que é de lectura doada. E non ten demasiadas páxinas, por se me preguntades!