A través do espello e o que Alicia alí encontrou

Hoxe tráiovos un deses libros que van aos meus andeis predilectos, onde colecciono as "Alicias". Xa celebraramos a publicación das Aventuras de Alicia no país das marabillas de El Patito Editorial, con tradución de Xavier Queipo e ilustracións de Fausto Isorna. Pois ben, agora, tráennos este A través do espello e o que Alicia alí encontrou, ese segundo volume que fala das andanzas da nosa protagonista pola Casa do Espello. Pouco hai que dicir deste libro mundialmente famoso, agás falar do que supón a tradución que realiza Queipo e as fantásticas ilustracións de Fausto, que racha con todas as anteriores para crear unha nova imaxe, colaxes con retallos que ofrecen unha renovada visión da nosa protagonista de sempre, arte-pop que explora aquelas partes máis surrealistas do texto clásico.

O meu tío Xakim

Fermín Solís é o autor deste divertido álbum ilustrado que publica El Patito Editorial: O meu tío Xakim fala da aceptación social das diferenzas, daqueles ou daquelas que semellan afasatarse do cotián e que tantas veces son mirados como estraños. Neste noso álbbum, unha visita inesperada dun recén chegado da India co seu elefantes vai virar a vida do lugar, facendo do visitante mesmo un heroe a quen admirar. Unha exaltación da propia personalidade que non debemos perder a causa das convencións sociais; por iso o noso protagonista é unha persoa auténtica e diferente que vive como el cre que debe facelo.

Presas fáciles

Publica en galego El Patito editorial este cómic, Presas fáciles, de Miguelanxo Prado, libro de denuncia social que vén de me encantar. Estamos ante un thriller que critica a corrupción económica servíndose das preferentes como argumento; ao mesmo tempo, tamén fala do drama da vellice, da súa indefensión social e da súa soidade. Así, e en branco e negro, pasearemos pola Coruña da man dunha inspectora espabilada que esclarecerá os asasinatos mentres reflexiona -para si- sobre a situación que provocou esta investigación.
E si, podería ser certo.

Aventuras de Alicia no País das Marabillas

Celebramos a edición deste Aventuras de Alicia no País das Marabillas por parte de El Patito Editorial, con tradución de Xavier Queipo, toda unha garantía, e ilustracións de Fausto Isorna, quen é quen de darlle unha volta diferente a un libro que constitúe todo un referente literario; colaxes con retallos de artistas omo Walton Ford, Darren Almond, Toni Smith ou Sebastiao Ricci, son quen nos aporta unha lectura visual tan afastada da tradicional e tan actual e surrealista a un tempo. Unha edición que cómpre termos ben preto!

De catro a catro

 Moit@s de vós xa sabedes que De catro a catro é un dos meus libros preferidos. Pois agora teño nas mans unha marabillosa edición realizada por El Patito Editorial a cargo de Luís Rei Núñez que conta coas ilustracións de Pablo Otero nun magnífico traballo. Nada novo teño que dicir dun libro sobradamente coñecido, agora en edición bilingüe, que supuxo que as nosas letras estivesen no mundo das vangardas de principios do século XX. Destacar o labor editorial, con este magnífico volume, e as ilustracións de Pablo Otero, en perfecta harmonía co texto, cadros que por si sós conforman unha exposición que fala de mar e ondas, de tempo que voa, de quietude, de reflexos enmascarados e de nós que abrollan tras os marcos.

Para ter nos andeis.

 

Rosalía de Castro. Poesía completa ilustrada

Se aínda dubidades cos agasallos, con este tédelo fácil. Son cinco tomos marabillosamente editados por El Patito Editorial. Cinco tomos arredor da nosa gran poeta Rosalía de Castro. Nalgunha outra ocasión xa falamos dun deles. E aquí, na páxina da editorial, podedes velos todos. Non imos falar de Rosalía de Castro, por suposto. Só falar desta extraordinaria colección: calquera dos seus tomos paga moito a pena. Este que vén de se publicar ultimamente, o quinto, supón unha compilación de poemas soltos tanto en galego coma en español que non están en ningunha das súas obras coñecidas. As magníficas ilustracións veñen da man de Manolo Figueiras.

Mar interior

Publica El Patito Editorial este Mar interior de Miguelanxo Prado, un paseo pola arte do noso máis internacional artista. O libro recolle o catálogo da mostra antolóxica do mesmo título exposta en Santiago de Compostela entre xullo e deciembro de 2014, así como ilustracións non expostas e un prólogo do propio autor. Para aquelxs que amamos a súa obra, é un libro ben especial e un agasallo seguro.

O dragón que cambiaba de conto cada vez que esbirraba

El Patito Editorial tráenos a colaboración de Miguelanxo Prado e David Aceituno neste álbum ben divertido e cun título ben curto: O dragón que cambiaba de conto cada vez que esbirraba. Topamos un dragón coa enfermidade do século XXI: a alerxia. Pero esta afección tan común no dragón convértese en especial, xa que fai que cambie de conto. Encántame! As ilustracións, compróbadeo, do gran mestre entre os mestres, supoñen un afastamento do seu último traballo por ser un traballo para a infancia en lugar da secuencialidade comiqueira á que nos ten acostumados.. Os lectores e lectoras poderemos acompañar a este feble dragón por un periplo libresco que é toda unha invitación á lectura con recendo clásico ao non faltar os elementos primordiais: dragón, cabaleiro e princesa. Pero o cambio é drástico!

Narf. Nas tardes escuras

Tal como adoita suceder coas obras publicadas por El Patito Editorial, o primeiro que chama a atención é a coidada e magnífica edición do libro. Logo, escoitamos o disco de Narf e admiramos as ilustracións de Fausto. E quedamos gratamente impresionad@s. Un elemento máis para traballar na aula e amosarlle ao alumnado como a nosa Rosalía de Castro é cada día máis e máis musicada. Ademais, un músico de Silleda para o meu alumnado de Silleda! Que máis se pode pedir para captar a atención?

Nas tardes escuras contén doce poemas (case todos de Follas Novas) musicados máis un texto recitado; música rockera marcada pola guitarra do artista e música pop combinada con recitados. As ilustracións tampouco vos deixarán indiferentes.

Tal como as nubes 
Nunca sospiro 
Cabe das froles 
Amores cativos 
Pasade
Ódiote 
Lúa descolorida 
Ti onte, mañán eu
Bos amores 
Follas Novas 
Nas tardes escuras 
Así semos.

Vida de nai

Veño de ler este cómic publicado por El Patito Editorial, Vida de nai de Gemma Sesar, Ramón Marcos e Jorge Castelli. Un libro sobre unha muller que é nai e empresaria, traballando a tempo completo porque é así a vida dunha moza con dous nenos pequenos que ademais tenta que a crise non se faga dona da súa vida. Primeiro creou un blogue para tentar contar a vida cotiá. E logo veu o libro. Unha historia de dous nenos felices e os seus pais case aturullados por tanto traballo. Vemos como a protagonista pasa por sucesivas fases: a de superheroína, a de enferma, a de muller normal que tamén necesita axuda de cando en vez e a da muller que se esnaquiza en miles de anacos. E todo isto rodeada dunha situación económica difícil que fará que tire dos seus proxectos e os defenda por riba de todo. Así que Vida de nai constitúese nun pequeno alegato social onde denuncia que a política de igualdade non existe e que a conciliación laboral e familiar case significa ser unha "superwoman"

Ninfas e caveiras

Fiquei marabillada con esta edición que nos propón El Patito Editorial: Ninfas e caveiras e outras elucubracións é unha selección de greguerías de Ramón Gómez de la Serna, ilustradas asemade por David Vela. Humor negro reinterpretado maxistralmente, ofrecéndonos un derroche visual e literario de metáforas surrealistas.

Minidramas

Publica El Patito Editorial esta compilación de viñetas de Edmond  Kirazian, algo inédito no estado. Non as traduciron á nosa lingua: están en español. Recoñezo que non é un libro que me interesase especialmente, a pesares de tratarse do escritor máis plaxiado do mundo: nestas viñetas nos ofrece o seu peculiar sentido do humor e da visión dunha muller que, en fin... seica é liberada e mundan. Pois vaia!

 Lin por aí que é unha lectura recomendada para xente elegante e con glamour. Será que eu non son nin o primeiro nin teño do segundo.

Ardalén

Impresionante o último traballo de Miguelanxo Prado, Ardalén, publicado na nosa lingua por El Patito Editorial -sae ao mesmo tempo en castelán-. Un cómic sobre a importancia da memoria, do mundo onírico, da esencia da nosa vida ou da procura da nosa identidade. Pero sobre todo, é un libro sobre a bondade e a maldade, as dúas características humanas que moven o mundo. Como escenario, unha aldea da montaña de Lugo onde poderemos identificar os nosos paisanos facilmente e onde realidade e fantasía forman un tándem perfecto. E neste tándem será delicioso perdernos, nesa mestura de documentos, fotografías, obxectos, narracións ou actas que acompañan os trazos asombrosos do autor.

Mensaxes

Mariano Casas publica en El Patito Editorial Mensaxes, un cómic que resultou ser o Premio Castelao de Banda Deseñada no ano 2008, un libro que se sitúa na apocalipse final da desorde e o caos. O libro conta as últimas horas de vida dunha parella refuxiada nunha imprenta, onde el debuxa constantemente o que lles ocorreu para que quede constancia no futuro do sucedido mentres ela non se resigna a morrer. Chama a atención a cor utilizada, sempre forte, que rematará sendo só vermella, e a propia narración que nas páxinas iniciais non presenta ningunha figura humana. Un cómic interesante.

Agatha Christie, cómic en galego

Celebro con ilusión este tipo de iniciativas que nos traen á nosa lingua clásicos en banda deseñada. Estou a falar de El Patito Editorial, que traduce, de momento, dous libros de Agatha Christie en formato cómic, aínda que na súa web non os topei. Hai tempo que se anunciara a versión comiqueira dalgúns dos libros máis famosos deste incansable escritora, pero o feito de gozalos na nosa lingua é algo que debemos aplaudir.

Podemos ler dous títulos:
Os Catro Grandes, onde Poirot debe enfrontarse a unha poderosa banda internacional de criminais, mesmo con risco da súa propia vida. O cómic está moi ben conseguido. A versión é de Alain Paillou (1958).


Morte no Nilo, desta volta a cargo dos franceses François Riviére e Solidor como debuxante. Desta volta a acción transcorre en Exipto e Poirot debe descubrir quen é o/a asasino dunha moza herdeira rica recén casada. Moi ben recreada.

Isto é París

Outro libro semellante ao anterior, do mesmo autor, Miroslav Sasek, e que tamén recupera El Patito Editorial. Neste caso o noso paseo é pola cidade de París, e volvemos gozar dunha viaxe ilustrada con completa información sobre os costumes, os espazos... con gran humor e ironía. Son destes libros que un gosta de mirar de cando en vez. Como no anterior libro do que vimos de falar, este tamén recolle a primeira versión de 1959 ademais de actualizacións esplicando o que xa non imos topar en caso de que levaramos este libro como guía en París

Isto é Londres

El Patito Editorial recupera para a nosa lingua este clásico de Miroslav Sasek de 1959. Un libro-guía de viaxes fermoso que un non cansa de mirar polo seu encanto e agudeza. A edición é magnífica, con actualizacións dalgunhas das cousas que xa non existes arestora pero que si destacaba o autor. As ilustracións sorprenden ao mesmo tempo pola súa delicadeza humorística, e nos dá unha completa informacións sobre todo o que alí destaca: a vestimenta, o transporte, o clima, os parques, as rúas...

Silvana, a Filla do Explorador. Os Espíritos Azuis

El Patito Editorial achéganos este cómic de Ramón Marcos, do que temos, polo visto, a primeira entrega baixo o título "Os Espíritos Azuis". Un cómic de aventuras no que destacan sobre todo o trazo e os recursos estilísticos e pictóricos, máis que a historia en si, unha historia onde se combina aventura e fantasía xunto con fenómenos paranormais.
Quedamos coas ganas de coñecer novas historias desta moza protagonista.

A mansión dos murmurios

Novamente El Patito Editorial tráenos un cómic interesante que nos deixa sen saber o final agardando unha segunda parte, faino novamente en galego, o cal é de agradecer, e volvemos a estar ante unha coidada edición, unha tradución dun orixinal francés como acontecía igualmente no último cómic que comentamos. O de hoxe está asinado por David Muñoz, con debuxos de Tirso Cons e cor de Javi Montes: A mansión dos murmurios lévanos de viaxe á Checoslovaquia de 1949 e ao nazismo da man dunha casa estraña onde todo semella paranormal. Veremos en que dá, porque de momento só temos o misterio e ningunha solución. Aínda que promete esta mestura de fantasía e realidade histórica, mesmo algunha dose terrorífica.

Milank. O prezo da supervivencia

Gustoume moito este cómic que vén de ser publicado en galego por El Patito Editorial. Escrito por Sam Timel e debuxado por Corentin, estamos ante un primeiro tomo das aventuras dun mozo que terá que se enfrontar á mafia rusa para sobrevivir. O título desta primeira entrega é O prezo da supervivencia e quedeime coas ganas de seguir lendo o segundo, que será Furacán. Ambos baixo o nome común de Milank. Coidadísima edición, tapa dura, aventuras dun guapo mozo, un goberno ruso corrupto... todos os ingredientes para converterse nunha serie de éxito entre os lectores comiqueiros.
A min paréceme moi recomendable.