Blogue de Gracia e de Anxo, blogue de pingas e de icebergs, do que nos preocupa ou nos chama a atención, de biblioteca e de aula.

30/11/11

Un tándem perfecto

A emoción, un día despois, pervive. Onte foi unha xornada memorable na historia do IES Chano Piñeiro: recibir a Xabier Docampo e a Xosé Cobas, parella de feito, para nos falar do seu proceso de creación, ben merece unha páxina nos anais deste edificio vetusto que loita cada día por darlle ao alumnado do rural as mesmas oportunidades que outro ten só por vivir no centro da cidade ou por estar nun instituto numeroso.
De Xabier Docampo pouco podemos engadir ao que xa comentaramos o ano pasado cando no medio da borrasca xurdiu a súa luz. Onte volvemos a reafirmarnos: deixa unha pegada indeleble no recordo do alumnado, coa súa natural graza e sentido do humor.
E que dicir de Xosé Cobas? Cobas é unha desas persoas que destilan bonhomía nada máis velos. Sábese que ao seu carón estase libre de enganos. Hai poucas persoas que leven retratada a bondade nos ollos: Cobas é un deles. A súa humildade é o que máis chama a atención, visto os innumerables atributos artísticos dos que goza. Admirar a súa arte, coller os lapis de cores e debuxar nun intre unha granada, por exemplo, deixa estupefacto a calquera.

Mergullados na actividade da Educación Ilustrada, este tándem perfecto, que nos deixa -de momento- máis de 20 libros para gozar de ambos xuntos, viñeron falarnos do seu proceso de creación. En palabras de Xabier Docampo, ambos buscan crear unha obra conxunta, non poñer ilustracións a unha obra. O proceso de creación conxunto evita a redundancia, algo que ocorre normalmente na ilustración; pola contra, eles buscan non dicir o mesmo dúas veces. Para iso é necesario que o que escribe Docampo non sexa un texto definitivo, senón que pode ser modificado; Cobas, logo dos primeiros bosquexos, pode cambiar o texto.
En palabras de Verlaine, a obra literaria sempre é inacabada ou abandonada: a obra sempre está aberta. Por iso Docampo asegura que o ilustrador di o que el non conta. Ratificando as afirmacións de Anthony Browne: o ilustrador débese coar polas fírgolas por onde meterse no texto. Docampo, convencido, reitera: as ilustracións non deben repetir o que di o texto, se fai isto falla a obra conxunta; a lectura non debe ser "aditiva", non é a suma de dúas partes senón que é unha unidade. O llibro ilustrado debe ser a totalidade entre o que di o texto e o que di a ilustración.
Cobas, cando comezou a súa intervención, corroborou: "eu interpreto o texto de Docampo"

Despois das palabras, comezou a acción. Esta foi a parte que máis nos gustou.
Docampo contounos un conto e Cobas procedeu a ilustralo. E resultou ser un momento máxico.
A historia dicía máis ou menos así:
Hai un home nunha cela no fondo dun gran edificio. Non sabemos a causa pola que está encerrado. O feito de estalo é en por si tan dramático que case non importa a causa.
Está só. Non hai nada na cela. Moi, moi alto, un ventanuco por onde entra a luz.
O home maxina que poderá ver algo a través desa fiestra. Unha paisaxe, quizais. Por iso, quere chegar a ela sexa como sexa. Pero está moi alta! E comeza a saltar. Cada día e cada vez logra saltos máis grandes. Ata que un día chega a tocar na sobreira da fiestra. O que lle dá novos folgos.
Por fin, un día consegue saltar tanto que pode apoiar os antebrazos e enfrontar o cadrado de luz. Logo conquistará as propias rellas. Pode mirar para fóra. E fóra só ve o ceo que ilumina o día. Ou o ceo que ilumina a noite.
Aquilo é o máis parecido á liberdade que pode ter.
E permanecerá agarrado para ver a luz. Non se sabe por canto tempo. Pero é canto ten.

Neste momento, Docampo cala e Cobas comeza.
Deixamos de respirar.
A arte obríganos a inventar o mundo.
E nós queremos formar dese mundo.
Este é o conto de Docampo na extraordinaria voz de Cobas:






Grazas mil veces pola vosa xenerosidade.

El horrible monstruo al que le encantaba leer


A editorial Silabario pon nas nosas mans este álbum El horrible monstruo al que le encantaba leer de Lili Chartrand con ilustracións de Rogé. Un libro moi divertido con ilustracións simpáticas para descubrir -se cómpre- a maxia da lectura.

La coleccionista de palabras


Veño de descubrir este fermoso álbum de Sonja Wimmer publicado por Cuento de Luz: La coleccionista de palabras é deses libros cos que compramos o profesorado de linguas polo seu contido, aínda que a ilustración tamén ten moito que dicir. Unha nena que decide agasallar palabras fermosas porque estas son necesarias nun mundo gris, cheo de guerras e violencia, é argumento máis que suficiente como para deter os nosos ollos neste álbum. Non vos parece?




Documental sobre o 15-M



Vía

29/11/11

Hutchinson. Serenity

O estudo parisino Fortiche Production realizou este spot para a marca de pneumáticos de bicicleta Hutchinson e o seu novo modelo Serinity.


Hutchinson Serenity from fortiche studio on Vimeo.



Vía

Minimalario versus Minimaladas



Outra das novidades de Kalandraka é este divertido Minimalario de Pinto & Chinto, que curiosamente non se publica na nosa lingua (?), compilación dos dous libro, Minimaladas, que si estaban en galego publicados pola editorial Xerais. Máis de cen historias divertidas que atinxen a outros tantos animais e que non defraudan.


Teño que recoñecer que me sigo a quedar cos libros de Xerais por estaren en galego, aínda que as ilustracións son agora algo diferentes e a edición é fermosísima, como adoita suceder cos libros desta editorial. Resulta realmente interesante ter os dous libros na man e comparalos, como cambian as ilustracións tan só pola textura do papel! Curioso.
Iso si, leades no idioma en que leades, ídelo pasar ben.

Éste era un águila que un día le dijo a un amigo:
-Las águilas tenemos la vista tan aguda que podríamos leer un libro a un kilómetro de distancia. Y apostó todo lo que tenía a que podría leer un libro a un kilómetro de distancia. Abrió un libro sobre una pradera y voló hasta un kilómetro de altura. Y el caso es que perdió la apuesta, porque las águilas tienen la vista muy aguda, pero no saben leer."


Contos por teléfono

Que podemos engadir nós a un libro que está escrito por Gianni Rodari, publicado por Kalandraka e ilustrado por Pablo Otero? Que paga a pena é indubidable, que deberiades mercalo cae de caixón, que ides gozar coa súa lectura é ben sabido...
Rodari é un clásico, un escritor que sabe achegarnos coma ninguén a fantasía e a maxia da literatura, e é o maior facedor do fomento da lectura a quen seguimos admirando. Sabía que a lectura é un divertimento, e como tal a trataba, e convencía.
Neste libro de relatos curtos (curtos tiñan que ser porque eran contados por teléfono, e non é precisamente un medio barato) xorde a fantasía para atrapar o lector nun entramado de xogos de palabras, soños e prodixios. E aí precisamente radica a importancia de Rodari: a capacidade inventiva da literatura é a base dos soños e de atrapar o lector.
A edición en galego que se nos presenta agora, en tapa dura e deliciosas ilustracións, con ese selo de calidade que asegura a editorial Kalandraka, confire a este libro unha necesidade nos nosos andeis, coa satisfacción de procuralo de cando en vez para deixarnos envolver por un conto que, inda hoxe, podemos contar por teléfono ao noso mellor amigo necesitado dun pouco de fantasía. Ou contárnolo a nós mesmos buscando ese neno que nunca deixaremos de ter dentro, se queremos.
Por que non?


Dor allea, berros

Xa unha vez falamos aquí da campaña de Médicos sen fronteiras, pílulas para a dor allea. Volvemos lembrala, desta volta con Tosar e Bardem berrando:


Te duele el dolor ajeno? Hazte oír

28/11/11

Lapis

O animador australiano Jonathan Chong dirixe esta animación dando unha vida diferente ao lapis.

Hudson - Against The Grain from Dropbear on Vimeo.



Vía

Cidades

Cando choro,
fágoo sempre sobre os mapas,
para que chova sobre as cidades preferidas.


Na procura dun libro de poesía axeitado para o meu alumnado de 2º de ESO cheguei -por recomendación de Carlos Negro- a Cidades, de Fran Alonso, publicado por Xerais, con ilustracións de Pablo Otero. Encantoume o poemario, pero veño de saber que está esgotado e por tanto é inútil falarlle del aos rapaces e rapazas, xa que nin sequera o hai na biblioteca do centro. Unha verdadeira lástima!
Resulta difícil escoller libros para esta franxa de idade, na que nin son tan maiores como eles cren nin tan pequenos como nós adoitamos pensar. Non están maduros, normalmente, para lectura máis "xuvenís" pero arrédanse das lecturas "infantís". E se falamos de poesía temos aínda un problema maior. Un xénero no que pretendemos motivalos, pero non podemos facelo con poemarios que se lles quedan "pequenos" nin con poemarios complexos que os afastaríasn do amor polo xénero. Por iso, cando lin este libro pareceume tan axeitado. Fran Alonso deita unha fermosa mirada poética sobre as cidades, mergullándose nelas e ofrecéndonos as súas cores, os seus olores, a súa vida cotiá, que inclúe sensacións, pensamentos, nostalxias, amores, medos... Un mundo de cidades ou unha cidade feita mundo.

O teu corpo é unha cidade
e, intensamente,
córreche o tráfico polas veas
e as arterias.
E cando choras é o mar,
que se revolve,
humidamente.
E na pel médranche os edificios,
tan supetamente,
e nos dedos arrabaldes.
E podes ser feliz sentindo o latexar
da vida toda que levas dentro,
urbana mente.

Es feliz
ata que os ollos se che anubran
brutalmente,
e toses, contraído,
pola contaminación.

Abraham Carreiro en Forcarei

Dentro da actividade da Ilustración que vimos de comentar, encádrase a visita de Abraham Carreiro. Nesta ocasión unimos ao alumnado do colexio máis maior e o noso do instituto máis pequecho coa lectura do libro Xoeliki, publicado por Sotelo Blanco, e pedímoslle ao autor do mesmo que viñese a falarnos do que mellor sabe facer: debuxar. Abofé que foi un éxito: todo un prodixio de velocidade co lapis e de amabilidade co público, que gozou aprendendo a dar os primeiros pasos dun cómic.
Moitas grazas, Abraham!



Mañá agardamos impacientes a Xabier Docampo e Xosé Cobas. Que emoción!



Educación ilustrada en Forcarei


Andamos mergullados esta tempada cunha actividade que demos en chamar "Educación ilustrada en Forcarei". Coa ilustración e da ilustración -ollo! non confundir coa Ilustración do século XVIII!!!- falamos e traballamos. Arestora, déixovos unhas fotos de dúas exposicións.

A primeira, unha alfaia que moito agradecemos á editorial Xerais, para cuxa xenerosidade non nos chegan as palabras de agradecemento, fermosa exposición artística de ilustracións:





Por outra parte, comezou xa a feira do álbum ilustrado, un ano máis. Damos as grazas a editoriais e distribuídoras que a fan posible:



Por suposto, repetiremos: o alumnado de diversificación acudirá ao colexio para lerlles algúns deses libros que temos na exposición aos máis pequenos.

27/11/11

Invulnerable

Unha curta moi dura e velente sobre a desesperanza, a soidade e o desemparo que alguén sente cando sabe que axiña vai morrer.



Vía Los jueves, corto

De sangre y ladrillos



Gustoume moito este cómic con guión de Régis Hautiére e debuxo de David François: De sangre y ladrillos está publicado por ediciones Kraken. Un cómic que é novela negra e que, coas características desta, engancha dende o principio. A acción desenvólvese nun lugar real, o Familisterio, situado en Guisa (Francia), un lugar que busca facer realidade as teorías do socialismo utópico e que se converte nun personaxe máis da historia. O tempo tamén é histórico: vai comezar a Primeira Guerra Mundial, dato importante a ter en conta na lectura do cómic. E logo xa podedes mergullarvos nun libro que vos terá atados a el ata rematardes a lectura.
O feito de tratarse dunha novela negra incide, supoño, na cor predominante nos debuxos, que adoitan ser escuros. O escenario é un lugar opresivo e o xeito de debuxar os personaxes achégaos ás caricaturas nas que é mesmo perceptible a mesquindade ou a honradez.

Non á violencia contra as mulleres (CCXXXIII)

Primeiro chegoume por Anxo, logo recomendáronmo no Facebook. Paréceme xenial:

Moitas adolescentes buscan en internet como esconder as pegadas da dor. Queren saber como disimular uns beizos inchados, como vestirse para que as súas parellas non se molesten... E non saben o que é o maltrato. De aí a existencia destes consellos: Comezan como calquera outro: coa mesma linguaxe, o mesmo ton, a mesma protagonista. Porén, o final é moi diferente, xa que se animará á adolescente a denunciar o maltrato.
O Instituto da muller e a Secretaría da Igualdade do Ministerio de Sanidade, Política Social e Igualdade está detrás desta campaña. A idea xurdiu na axencia de publicidade "La Despensa". Falaron con blogueiras e xuntos gravaron os vídeos. Así, cando as adolescentes vaian á internet por estes temas acabarán atopando unha mensaxe de denuncia.
Os vídeos afástanse da linguaxe publicitaria. As blogueiras utilizan as súas formas de sempre. As frases foron pronunciadas por mozas maltratadas.

1.- Qué ponerte para que te deje salir/Que poñer para que te deixe saír:



2.- Cómo disimular los labios hinchados/Como disimular os beizos inchados:



3.- Cómo maquillar un ojo morado/Como maquillar un ollo morado:



4.- Cómo llorar sin que se corrar el rímel/Como chorar sen que corra o rímel:




5.- Cómo voy hoy/Como vou hoxe:



Vía

Nesta sociedade tan "moderna", aínda lemos cousas coma esta

26/11/11

Bilbao, km 0 das enerxías limpas

Moi boa publicidade, con moito humor: Bilbao, km 0 de las energías limpias



Semanas, meses

Reko e Tina Lundán escriben a dúas mans Semanas, meses, publicado pola Faktoría K. Non estamos lendo unha novela, senón un diario da dor, da perda, do sufrimento, da morte. É un relato desolador e terrible de como unha parella con dous fillos se debe enfrontar a un cancro terminal. Dende os dous puntos de vista, as dúas vítimas do sufrimento escribirán sobre o día a día, os seus medos e o seu agotamento, sobre o cotián que non volverá, sobre o amor e a tristura da perda. Non é ficción, é realidade: o lector verase envolto nun mar de dúbidas pero tamén de certezas, de angustias combinadas con ledicias, desas contradicións eternas que compoñen a vida de cada un. Así, repensaremos como espectadores e posibles protagonistas que é o máis importante, como sería a despedida, eses anceios de vivir aos que nos aferramos cun ferro ardendo.
Quizais o máis interesane é o punto de vista da muller, o recoñecemento do egoísmo que ás veces é imparable, o esgotamento, a loita de sentimentos antagónicos que, como é lóxico, xorden nela de cando en vez. Chama a atención a aparente frialdade coa que está escrito o libro nesta loita que só ten un fin posible.
Unha lectura máis ca interesante.

Minna

Logo de preguntar polo tempo, entendín decontado que fora un erro. Aki palideceu e temín que sufrise un novo ataque. Metín a man no seu peto e saquei unha latiña de caramelos que contiña tranquilizantes. A pílula quedou rodando na súa boca. Eu coñecía o sabor fariñento e nauseabundo do valium seco cando se apega ao padal. Na miña cabeza golpeaban aínda as palabras da médica. Que pouco tempo de vida lle dera ao meu marido!

Aki

Que sentido ten comezar a escribir unha novela cando se chega á casa do hospital, despois de saber que se teñen semanas ou meses de vida? Nin na fase máis eufórica, producida pola cortisona, sería posible cumprir a tarefa a tempo. E por que estraña razón debería escribir fose o que fose ata as derradeiras forzas? Non sería máis importante lerlle un conto á pequena Kerttu todas as noites? Falar con Saara sobre como foi o día?



Unha vez máis, moitas grazas Ramón polo agasallo e parabéns polo traballo.

Contra a violencia, no centro


Todo o alumnado do IES Chano Piñeiro traballou este tema. O alumnado de Relixión veu diversas curtas e logo realizaron alegacións contra a violencia de xénero. O alumnado de francés souberon da existencia da campaña francesa "Ni putes ni soumises" e traballaron sobre ela. O alumnado de 2º ESO de galego aprendeu o que é o "Twitter" e escribiu mensaxes curtas; nas titorías, e Educación para a Cidadanía... entre todos e todas lembramos a existencia das diferenzas que aínda perduran entre homes e mulleres.
No corredor da biblioteca pódense ler algúns destes traballos, a carón dunha bata de home e outra de muller que simbolizan a igualdade.







Nas fotos podedes ver a montaxe e o momento en que o xurado deliberou a quen darlle o premio á mellor mensaxe:



25/11/11

Non á violencia contra as mulleres (CCXXXII)

Como cada ano, recollemos dos blogues das bibliotecas escolares e de normalización o que neles se vai plasmando sobre este día.

No IES Fernando Esquío: se acabaron las lágrimas. Unha guía para mozas. Outras realidades. Ademais, neste mesmo blogue, estes "poemas contra a violencia":








En Bibliomelide traballaron abondo.

N' O Recanto de Mik infórmannos desta interesante proposta: "Yo cuento, tú pintas, ella suma". Neste mesmo blogue unha serie de recursos e materiais.

Un rato na biblioteca, lembrando.

Bibliochivite, con poesía. E con tan fermosa montaxe.

En Orbilmanía, El monstruo.

En O Crocaio de Sampaio, suxestións para as aulas.

O IES Ponteceso presenta cartel e guía. E realiza curtas.

O CEIP Víctor Sáenz elabora unha páxina de recursos que podedes consultar premendo aquí.

Dende a Biblioteca do IES Ribeira de Louro chega esta presentación:

25N - Contra o maltrato on PhotoPeach







En Aquisfala, poema.

Dende Viveiro chéganos esta viñeta:



No I.E.S. Xesús Taboada Chivite de Verín traballaron así de ben.

No CEIP Alexandre Bóveda propoñen estas actividades. E amosan este mural. E esta exposición.

O CEIP de Frian tamén recolle diferentes actividades.

O Crocaio de Sampaio reflexiona sobre a igualdade no deporte.

Dende a biblioteca do IES San Paio ofrecen este cartaz. Ademais, esta escolma de lecturas.

Do CEIP Andrade, estas actividades para primaria. A recomendación deste blogue. E este conto da bruxa Pandora.

No IES de Cacheiras, declaración institucional.

Na Biblioteca Sarmiento, dinnos que é unha relación e dannos unha receita de amor.

E neste blogue... recollen bicos!

Claro que na Biblio Vilar Ponte ofrecen outros finais para vellos contos:




No CEIP Virxe de Rocío tamén seleccionas algunhas propostas, así coma no CEIP Rosalía de Castro.

No blogue da Silva tamén recollen información.

Na biblio de Olhos Grandes falan da intransixencia.

En Bueu realizaron un concurso de carteis.

Máis alá de blogues de noso podemos acceder a informacións coma esta ou esta. E acudimos a Amnistía Internacional.

No Segrel do Penedo agasállannos con este vídeo sobre crecer en desigualdade:



En Maside topamos un gran traballo do alumnado de 3º de ESO. Parabéns!!! Aquí toda a información.




No Choupin podemos ver unha excelente montaxe contra a violencia de xénero. E realizaron diferentes actividades.

O CPI Progreso de Catoira realizou un manifesto.

Na Biblioteca do Colmeiro tamén expoñen os seus traballos.

Percorrendo a xeografía galega, chegamos a Allariz.

No Poeta Díaz Castro tamén traballaron arreo.

No IES Ponteceso elaboraron estas curtas.

No IES Ribeira do Louro fixeron unha cadea humana.

No IES de Curtin ofrecen esta unidade didáctica.

Raioteca: proposta de actividades.

Biblioteca do Chouzo.

Ars Legendi
: 15 artistas contra a violencia de xénero.

E Baiona pega un chimpo:



Engadimos por último esta ligazón ao blogue do IES Fontem Albei da Fonsagrada.

Non á violencia contra as mulleres (CCXXXI)

Un ano máis, e a pesar das circunstancias difíciles que nos rodean, o noso blogue crea un vídeo para falarmos do día de hoxe, 25 de novembro. Veredes que é completamente diferente ao realizado os anos anteriores, xa que desta volta contemplamos a posibilidade de facelo en positivo. Aí queda. Ogallá, ogallá, servise para algo.

Día Internacional contra violencia de xénero 2011 from trafegandoronseis on Vimeo.

24/11/11

Malas noticias

Bad News - A Media Fiction (Diplom) from Nico Uthe on Vimeo.

Alas y olas



De dous Pablos (ao igual que Dióxenes), Pablo Albo e Pablo Auladell, fermosísimo e poético -sonoro e visual- álbum que publica Barbara Fiore: Alas y olas. O amor, o amor humano ou non humano, o desexo, a soidade... os sentimentos son os que dan forman a este libro, porque con carne, con ósos, ou con ás, necesitamos fuxir da soidade, topar un anhelo que nos manteña vivos, que nos faga sentir. Porque é este verbo quen fai voar, nadar, pescar, respirar... ou camiñar en terra firme. Escollamos o que escollamos, deixemos un espazo para o outro. É neste espazo onde podemos salvar a humanidade que nos fai diferentes. Aínda sen sabelo.
Un deses álbums que demostran a súa inserencia no mundo dos adultos, que serven para convencer que os álbums son para adultos. Sutileza metafórica para describir sentimentos con ilustracións en tamaño XXL que se agradecen para gozalas a pleno rendemento.

Para conseguir aquellas alas, la condición era clara: “Nunca usarás la facultad del vuelo para conocer la intimidad de los otros”. Él accedió. Y fue sincero cuando mintió al decir que cumpliría. Y cumplió por mucho tiempo.


Non á violencia contra as mulleres (CCXXX)

Teño a sorte de ter lectores tan atentos que me axudan a crear entradas. Unha fermosísima canción que nos propón Xabi, a "Canción de Gabriela" da película "Tierra de Ángeles".
Moitas grazas pola aportación, prezado Xabi.



Mentres, seguimos a ler noticias tan aberrantes coma esta, que inda ten a capacidade de abraiarnos mentres a rexeitamos e agardamos tempos de iguldade: Unha muller afgá condenada a 12 anos de cárcere por ser violada.

En Colombia non quedan atrás: si no es para mí, no es para nadie.



23/11/11

Rosa

Curta de animación de Jesús Orellana, ROSA, seleccionada para festivais como Screamfest, Toronto After Dark, Anima Mundi, Los Angeles Shorts Film Festival ou Sitges:

ROSA es un corto de ciencia ficción épica que se desarrolla en un mundo postapocalíptico, donde toda la vida natural ha desaparecido. De la destrucción surge ROSA, un cyborg creado para el proyecto Kernel, el último intento de la humanidad por restaurar el ecosistema de la Tierra. ROSA pronto aprenderá que no es la única entidad que ha despertado y que debe luchar por su supervivencia”.



ROSA from Jesús Orellana on Vimeo.



Vía Mangas verdes

A lo bestia


Poemas de Mar Benegas e ilustracións de Guridi compoñen este A lo bestia publicado por República Kukudrulu. Un libro de poemas divertido e imaxinativo, absolutamente delicioso, que procura o ritmo e a musicalidade nos seus versos. Un xogo poético que non deixa indiferente. E como de bestas falamos, deixádevos transformar grazas á poesía en crocodilo, avestruz... ou calquera animal inexistente que ben podemos contemplar.


Conjuro primero

Por un sustantivo
ni duermo ni vivo.

Por un predicado
me has cateado.

Saber si es con uve
la fiebre me sube.

Un verbo en presente
me nubla la mente.

De nada depende:
¡Serás mi serpiente!
********
Mi hermano cachorro

¡Un canguro llorón!,
un enano sin dientes,
un pañal con sorpresa
siempre oliendo a serpientes.

Que vomita, no hay parque.
Que se duerme, no hables.
Cuídalo con amor
y además no lo estampes.

Que si estate con él,
que si dale el juguete,
que si no se te ocurra
esconderle el chupete.

No lo hagas llorar,
no le dobles el brazo,
no le pintes la cara,
ni le des un codazo.

Nadie sabe qué hazaña supone
el tener un cachorro bebé,
además de un misterio increíble
que aún así yo lo pueda querer.

Non á violencia contra as mulleres (CCXXIX)

"Cicatrices":

22/11/11

Torre de Oña



Dende Capítulo 0, claro.

Casualidad


Casualidad -Premio ao libro ilustrado en Corea- é un libro moiiiiiiiiiiiiiiiii longo e estreito (135 cm x 430 cm) publicado por Barbara Fiore, ilustrado por Pablo Amargo e escrito por Pepe Monteserín. Unha fermosa historia sobre crer ou non no destino, ou na casualidade, que vén sendo case o mesmo. Porque crer na casualidade é “una disculpa de los que no entienden las cosas”.
Un libro que vos chamará a atención, pola forma, o tamaño, polo texto e polas ilustracións. Nada é igual, todo é diferente. E non é casualidade!

En Ventoso las palabras se las llevaba el viento. Las promesas eran pasajeras y también los insultos nos resbalaban. El cariño lo demostrábamos con abrazos...


Non á violencia contra as mulleres (CCXXVIII)

No blogue do IES Fernando Esquío descubro esta boísima curta, "Propiedad privada":





O Instituto asturiano da muller presentou este traballo didáctico para a prevención da violencia de xénero a partir da análise da curtametraxe de Ángeles Muñiz “Propiedad Privada”. Baixo o lema "construíndo contigo a igualdade" nesta curta abórdase a violencia que poden sufrir as mulleres na súa vida cotiá, nas súas relacións afectivas e como a tolerancia da contorna non axuda a atopar unha saída.

A verdadeira situación que vive Marta, a protagonista, na intimidade do seu fogar, non se reflicte na posición social que ten nin na amabilidade de Carlos coa familia e as amizades da parella. Marta vese encerrada nunha dinámica de sometemento, control e continuas agresións físicas e psicolóxicas por parte do seu compañeiro.

Unidade didáctica en PDF.

21/11/11

15-M en Movistar

Movistar realizou un spot frivolizando un dos aspectos máis característicos do 15-M: o seu carácter asembleario.




En resposta, a versión "mellorada" do anuncio:



Vía

Viva la vida


Un cómic asinado por Baudoin e Troubs e publicado por Astiberri: Viva la vida. Los sueños de Ciudad Juárez. Un libro que busquei pensando no 25 de novembro e que quere apostar pola esperanza en contra da realidade diaria dunha cidade no que cada día morren asasinadas moitas persoas, famosa polo seu terrible feminicidio, pero onde a xente tamén ten os seus soños, eses que se empeñaron en recoller estes autores debuxantes de historias.
É un cómic diferente que mestura reflexión, narración e diálogo, obxectividade e subxectividade, o que fai que esteamos ante un libro indispensable: un debuxo a cambio dun soño, iso é o que ofrecían os autores. Quen se pode negar? Un cómic-caderno de viaxes cheo de emocións e emotividade, onde observamos de primeira man como vida e morte pasean da man nunha cidade castigada por estar, seguramente, demasiado preto dunha fronteira infranqueable. Onde ser muller é máis difícil que noutras partes do planeta. Onde, a pesar de todo, hai futuro.




Viva la vida. Edmond Baudoin et Jean-Marc Troub's from CasadeFrancia Digital - IFAL on Vimeo.

Non á violencia contra as mulleres (CCXXVII)

Un extraño en mi bañera:



Eduardo Galeano:

Por algo fueron mujeres las víctimas de las cacerías de brujas, y no sólo en los tiempos de la Inquisición. Endemoniadas: espasmos y aullidos, quizá orgasmos, y para colmo de escándalo, orgasmos múltiples. Sólo la posesión de Satán podía explicar tanto fuego prohibido, que por el fuego era castigado. Mandaba Dios que fueran quemadas vivas las pecadoras que ardían. La envidia y el pánico ante el placer femenino no tenían nada de nuevo. Uno de los mitos más antiguos y universales, común a muchas culturas de muchos tiempos y de diversos lugares, es el mito de la vulva dentada, el sexo de la hembra como boca llena de dientes, insaciable boca de piraña que se alimenta de carne de machos. Y en este mundo de hoy, en este fin de siglo, hay ciento veinte millones de mujeres mutiladas del clítoris.

No hay mujer que no resulte sospechosa de mala conducta. Según los boleros, son todas ingratas; según los tangos, son todas putas (menos mamá). En los países del sur del mundo, una de cada tres mujeres casadas recibe palizas, como parte de la rutina conyugal, en castigo por lo que ha hecho o por lo que podría hacer:

—Estamos dormidas— dice una obrera del barrio Casavalle de Montevideo. —Algún príncipe te besa y te duerme. Cuando te despertás, el príncipe te aporrea.

Y otra:

—Yo tengo el miedo de mi madre, y mi madre tuvo el miedo de mí abuela.

Confirmaciones del derecho de propiedad: el macho propietario comprueba a golpes su derecho de propiedad sobre la hembra, como el macho y la hembra comprueban a golpes su derecho de propiedad sobre los hijos.

Y las violaciones, ¿no son, acaso, ritos que por la violencia celebran ese derecho? El violador no busca, ni encuentra, placer: necesita someter. La violación graba a fuego una marca de propiedad en el anca de la víctima, y es la expresión más brutal del carácter fálico del poder, desde siempre expresado por la flecha, la espada, el fusil, el cañón, el misil y otras erecciones.


Podedes lelo aquí traducido á nosa lingua por Beatriz Fernández Barbosa.

20/11/11

Ara Mès Aranés

Vídeo da campaña de difusión e promoción da lingua aranesa.

Vidèo dera campanha de difusion e promocion dera lengua aranesa.

Vídeo de la campanya de difusió i promoció de la llengua aranesa.


Mans


Tiven a sorte onte de que Xabier Docampo me ensinase este libro que vén de publicar en Everest: Mans, con fotografías do seu fillo Daniel. Son estas as que dan base ao texto, as que inician a narración, as que dan a propia idea da existencia do libro, ao contrario do que adoita suceder. E realmente son as que chaman a atención: impresionan esas mans que piden, que choran, que bican, que queren, que odian. Mans brancas ou mans negras. Mans xenerosas e mans avarentas. Mans que falan. Mans que calan.
Pareceume un libro fermosísimo, aínda que o vin e lin a correr antes de entrar nas xornadas. Pero inda teño retidas esas mans que tanto teñen que dicir, tanto que foi Xabier quen lles puxo voz para combinar a idea fotográfica nun pequeno libro perfecto.

Non á violencia contra as mulleres (CCXXVI)

Falando deste día nas aulas de 2º de ESO recomendáronme este tema que inda non formaba parte do blogue: "La bella y la bestia" de Porta:



Beatriz Fernández Barbosa coméntanos no Facebook estoutra canción para este día. Grazas, Beatriz: "Vaite" de Ialma.

19/11/11

Como alimentar o mundo

18/11/11

The Last Train

The Last Train from Animation Hub on Vimeo.



Vía Arte y Animación

Na busca dun fogar


A novidade que nos chega de Patasdepeixe é este simpático libro de Alexis Deacon ilustrado por Viviane Schwarz: Na busca dun fogar. Un grupo de irmáns que amosan a súa valentía buscando un novo fogar; no seu camiño toparán de todo: mares, montañas, monstros... pero eles proseguirán o seu camiño porque teñen que buscar un lugar axeitado para residir todos xuntos.
Un libro moi simpático e curioso. Tanto que a ilustración deixará paso á fotografía. E non digo máis!!!

La campeona mundial de mantenerse despierta


Con texto de Sean Taylor e ilustracións do incomparable Jimmy Liao publica Barbara Fiore La campeona mundial de mantenerse despierta, álbum que destaca polas súas ilustracións, non podía ser doutro xeito sendo de quen son. Unha nena que non pode ir durmir sen antes deitar aos seus xoguetes preferidos, facendo todo o necesario para que estes durman antes ca ela. As ilustracións son extremadamente doces á vez que divertidas, construíndo un álbum fermoso para os máis peques e a súa imaxinación sen fin.


Carta ao presidente Franklin do xefe indio dos Swamish

17/11/11

U.F.O

U.F.O from Thomas Salama on Vimeo.



Vía Arte y Animación

Febre

Gustoume moito, moitísimo, a nova proposta da colección de Fóra de Xogo de Xerais, o libro no que recaeu o Premio Fundación Nova Caixa Galicia-Claudio San Martín da Literatura Xuvenil 2011. Estamos a falar de Febre de Héctor Carré, un libro sobre a igualdade da muller, sobre a posguerra, sobre a Segunda Guerra Mundial, sobre a falta de escrúpulos, sobre o abuso da autoridade, sobre a esperanza, sobre o Amor, sobre a vinganza... Unha novela moi cinematográfica que recomendarei con entusiasmo ao meu alumnado e que ademais vénme arestora de marabilla para a exposición que imos realizar no centro en contra da violencia de xénero. Porque tamén este libro serve para tratar este tema, esa supostamente superioridade masculina que algúns personaxes da novela reclaman constantemente, así como diversas escenas que nos desquician ante a impunidade con que eran cometidos certos delitos.
Pero ademais é este libro unha proposta interesante para calquera tipo de lector, teña a idade que teña. Renxen unhas poucas frases que amosan un certo grao de didactismo ou moralismo, e que sorprenden nun conxunto tan ben construído. Pero son fáciles de esquecer ante unha historia ben afiada que nos atrapa na súa arañeira dende a primeira páxina ata a última. Porque se algo encomiable ten o libro é precisamente iso: o seu xeito narrativo non permite que o lector tome un alento de folgo, posuidor dun temor constante ante o que poida ocorrer, ávido por seguir páxina tras páxina ata o final. Con el sentimos as inxustizas, a inexistencia da ética persoal, o ambiente opresivo da época. E gozamos dunha heroína que anhela unha liberdade case conquistada arestora confundíndoa mesmo coa imaxe de Katherine Hepburn, esa imaxe que a protagonista tomabaa como espello para loitar por ser muller, persoa, humana.
Un libro para celebrar nas aulas a boa escrita da nosa literatura.


Las Hurdes / As Hurdes

De Luis Buñuel:





16/11/11

Iluzia

Iluzia from udi asoulin on Vimeo.



Vía Arte y animación

Pablo


A outra novidade da editorial Sleepyslaps é Pablo, de Susana Pérez Barrera. A busca da liberdade tratada con absoluta delicadeza, con imaxes serenas, cheas de cor e fantasía. A imaxinación predomina tanto no texto como nas imaxes, dando renda solta á creatividade e liberando unha gran mensaxe de esperanza. Un conto tenro e intimista que nos fala dos primeiros sentimentos, das primeiras ilusións e (por que non) tamén das primeiras desilusións.
Precioso.

El autobús de Rosa


Tan pronto como vin este libro pensei inmediatamente en Agustín Fernández Paz. Un álbum ilustrado, sinxelamente precioso, que sei que lle vai encantar porque fala da historia de Rosa Parks, unha persoa esencial na historia da humanidade e que eu coñecín grazas a un correo del hai tempo e que ilumina a portada do seu último libro.
Estou falando de El autobús de Rosa de Fabrizio Silei con ilustracións de Maurizio A. C. Quarello, publicado por Barbara Fiore. O libro achéganos a historia de Rosa Parks dende a perspectiva dunha testemuña que estivo alí e non tivo o mesmo coraxe ca ela, algo que desexa transmitir ao seu neto. Por iso, afirma, el non forma parte da historia e ela si, xa que a valentía que ela amosou non é común.
O autobús consérvase no Museo Henry Ford en Michigan.
As ilustracións son fantásticas, semellan cadros feitos a pastel, sen cores para a parte histórica e con cores na época actual cando vemos a historia do avó e o neto.






Un bo consumidor

15/11/11

The Plague Bearers

No ano 1655, a peste negra chega a Eyam, unha pequena vila onde o único que se pode facer é agardar polo doutor orando. Unha curta de Zoë Moss que mestura stopmotion e animación tradicional.

The Plague Bearers from Zoë Moss on Vimeo.



Vía Arte y animación

Bruja Bruja


Sleepyslaps sempre nos sorprende con álbums especiais, delicados. Hoxe falamos de Bruja Bruja con texto de Pablo Albo e ilustracións de Miguel Ángel Díez. Unha bruxa moi especial que debe aprender a equivocarse, con constantes referencias ao lector e bromas sobre o propio libro que se converte á súa vez en protagonista da historia, como xa se pode ver na portada do mesmo.
Todo o libro é fermoso, as ilustracións fantasticamente detallas e descritivas.

Neste blog utilizamos as imaxes con finalidade educativa. Se algunha delas estivera suxeita a dereitos de autor, rogamos que vos poñades en contacto connosco para retirala de inmediato.