Quen lle ten medo á Carapuchiña Vermella?

Mellor libro ilustrado no ano 2009, Quen lle ten medo á Carapuchiña Vermella? é un simpático álbum de Sara Sahinkanat e Ayse Inan Alican publicado por Linteo. Unha maneira oposta de adentrarse no clásico conto da Carapuchiña, confundíndonos cunha nova visión dos perigos e arricándonos un sorriso. Unhas ilustracións en vivas cores cheas de detalles e un texto sobre o valor da responsabilidade fan que este libro sexa moi axeitado para idades ben temperás. 

Temos que agradecer a esta editorial o feito de que nos ofreza estes álbums na nosa lingua.

"Escoita atentamente, meu amor, vexamos se estás preparado. Teño que facerche algunhas preguntas, xa que vexo que non tes medo".

Que tal, vexetal?

Ediciones Linteo publica na nosa lingua Que tal, vexetal?. Alimentos con sentimento de Saxton Freymann e Joost Elffers. Un xeito divertido de nos presentar os diferentes sentimentos que os humanos podemos sentir a través da fotografía de vexetais tallados con coitelo, de aí a súa orixinalidade. Resulta realmente abraiante o resultado: os vexetais son quen de expresar todas as emocións sen necesidade de recorrer ao escaso texto que acompaña as fotografías.
Un bo libro para xogar cos máis peques.

Pedro Guedellas

Aínda que a editorial Linteo publica Pedro Guedellas de Heinrich Hoffmann no ano 2001, é agora, grazas á Feira do Álbum ilustrado que estamos a realixar no centro, cando chega ás miñas mans. O libro reproduce o manuscrito de 1858, conservado na Biblioteca da Universidade de Frankfurt am Main, así que maxinade que tipo de álbum ilustrado temos: unha xoia histórica.

No ano 1844 Heinrich Hoffmann (1809-1894), despois de buscar nas librarías de Frankfurt nas vésperas de Nadal un álbum ilustrado para o seu fillo de catro anos, decidiu mercar un cadernos e escribiu unhas historias que ilustrou cos seus propios debuxos; un tipo de literatura aleccionadora destinada neste caso a advertir sobre as consecuencias negativas de actuacións infantís fóra da norma de conduta considerada correcta na época.
Ademais de ser unha edición facsímil está en galego, que máis se pode pedir?