Blogue de Gracia e de Anxo, blogue de pingas e de icebergs, do que nos preocupa ou nos chama a atención, de biblioteca e de aula.

15/08/18

Alter-nativo

Precioso cómic de Jorge Campos e preciosa edición de Airas para este Alter-nativo sen palabras que nos ofrece diversos universos e onde o lectorado é quen de escoller o seu propio camiño, un camiño alternativo. Porque as decisións son importantes e porque segundo estas a vida vai por un camiño ou por outro; que elixes?: subir unha montaña ou seguir camiñando pola praia? Elixe e segue lendo. De aí que o libro nos ofreza un labirinto alternante, un labirinto narrativo que a edición en forma de acordeón nolo fai máis doado. Mentres paseamos polas súas páxinas, referencias varias a libros e a autores, como Verne cou como Moby Dick. Interesan todas as historias, de aí que nos demoremos na lectura, posto que queremos achegarnos a todas as posibilidades que nos ofrece, esas fantásticas aventuras dun náufrago nunha illa deserta.
Non deixedes de lelo. Deixa sen palabras!


13/08/18

Bajo el hielo

Despois de ler No apagues la luz, quedara con ganas de seguir lendo a Bernard Minier e por fin agora puiden achegarme ao seu primeiro libro, Bajo el hielo, publicado por Roca. E é que Minier é un dos mellores autores de novela negra de Francia e do mundo, dende o meu punto de vista. E con este libro confírmase a miña teoría; o peor é que arestora sei que teño que lelo todo, non o podo evitar. Martin Servaz é asemade un deses detectives que resultan inesquecibles: hipocondríaco e culto, quería ser escritor e recita en Latín.
O libro conta con todos os ingredientes necesarios para que unha novela negra sexa boa; pero sobre todo chama a atención a ambientación, o lugar frío e opresivo que nos asolaga en cada páxina; coas descricións detalladas que nos agasalla o libro, paseamos por ese páramo paisaxístico e temos o mesmo frío que o protagonista. Canda este frío a anguria permanente que nos absorbe e que nos mergulla na natureza humana máis perversa. 
Quizais poida resultar unha lectura algo densa, pero paga a pena a perturbación que desenvolve e que nos sorprende continuamente. Nunha palabra, xenial.


10/08/18

Nelson Mandela. O camiño cara á liberdade

Antonio Lozano é o autor de Nelson Mandela. O camiño cara á liberdade, publicado por Kalandraka. Unha biografía novelada pensada para un lectorado adolescente que dá a coñecer esta figura imprescindible da hosa historia máis recente. Este ano celebramos os cen anos do seu nacemento do mellor xeito: achegar a vida de Mandela á xente nova é imprescindible, por ser un home extraordinario que guiou o seu pobo cara a liberdade perdoando e reconciliándose cos seus propios verdugos. O autor faino a través do bisneto de Mandela, un rapaz que contaba tan só con trece anos cando ese home admirable morreu. E fíxoo sen que este neno, Walter, puidese preguntarlle todo canto quería saber del para aprender do seu exemplo en primeira persoa. 
Está ben como achegamento, como digo, pero a historia semella algo inconclusa. A vida do neto, totalemente ficticia e que foxe da realidade, é unha viaxe para coñecer a figura importante. Bótanse de menos máis datos importantes e máis desenvolvemento da vida de quen nos ocupa e sobra trama dos personaxes. Aínda así, é unha lectura lixeira que cando menos cumpre a función de que a rapazallada coñeza a Nelson Mandela dun xeito doado.




09/08/18

7-7-2007

Son fiel a algúns autores, como a Antonio Manzini, a quen sigo dende o primeiro libro que publicou Salamandra na súa colección Black. Arestora temos esta quinta entrega, 7-7-2007, quizais do mellor del e que nos dá as claves para entender en parte os libros anteriores (e o carácter do protagonista), para saber que lle ocorreu a Marina e que desenvolve dous fíos temporais entrelazados. Camiñaremos por un deses fíos, o máis importantes, e marcharemos a Roma para entender o pasado e o presente de Rocco, para sabermos como era nun principio e cal foi a causa da súa desesperación. A investigación que levou a cabo levouno a un precipio insospeitado, a un testamento de dor que perdurará dez anos ata chegar a Aosta. Ese lugar que tan ben coñecemos e que nos leva a a camiñar polo outro fío.





04/08/18

Eroski paraíso

Na Biblioteca de Teatro da Editorial Kalandraka podemos atopar esta peza fundamental de Chévere: Eroski paraíso. Un proxecto escénico que fala dun paraíso social que non existe por moito que nolo prometeran. Esas promesas incumpridas que nos ofrecen co mellor márketing e que como boa publicidade saben enganar e saber convencernos. Somos compradores dun supermercado onde a vida escorrega entre as mans e tentamos pendurala mercando. Queremos parar, ollar ao noso arredor e que todo siga igual. E non o conseguimos, porque nada permanece así, todo se transforma. De aí procede o desarraigo. De aí confúndese a memoria. A obra ofrece unha reflexión constante, un documental, unha película sobre os protagonistas, sobre a cidade, sobre a evolución, sobre os cambios.

03/08/18

Noche antigua

David Álvarez é o autor de Noche antigua, álbum ilustrado sen palabras publicado por Fondo de Cultura Económico. Un álbum sen palabras que nos envolve na súa dualidade: o día e a noite, a vida e a morte, a escuridade e a luz. Todos os elementos que se opoñen para establecer o equilibrio do universo. Poderemos observar unha lúa que cambia de aparencia e unha noite que se transforma en día, grazas aos animais que xogan con estes elementos.


01/08/18

Herbario

Delicioso este libro que publica Libros del Zorro Rojo de Adrienne Barman: Herbario é un catálogo botánico que leva unha orde moi diferente á habitual: plantas sorprendentes, plantas indecisas, plantas anciás, plantas máxicas, plantas purificadoras... Cores vivas que chaman a atención e que constitúen unha atracción constante en cada páxina. En realidade todo o libro constúe un saboroso informativo que se pode follear como unha enciclopedia herbárea, ou un divertido álbum. Unha riquiñez!!!







Neste blog utilizamos as imaxes con finalidade educativa. Se algunha delas estivera suxeita a dereitos de autor, rogamos que vos poñades en contacto connosco para retirala de inmediato.