Te quiero

A editorial Lata de Sal -na súa colección Vintage- tráenos este libriño mínimo titulado Te quiero, escrito e ilustrado por Remy Charlip en 1967. E se dicimos que é mínimo, é literalmente certo, xa que podedes gardalo en calquera peto. Un libro que fala de amor maternal con humor e creando case un trabalinguas. Para querelo, sen dúbida ningunha.

O chaleco de Ratiño

Recupera a editorial Lata de Sal este clásico xaponés de 1974: O chaleco de Ratiño é de Yoshio Nakae e Noriko Ueno. Un rato que recibe un agasallo da súa nai, un precioso chaleco que pasará de man en man entre os animais do bosque porque a todos gusta e queren probalo. Pero, eses animais son a cada cal máis grande... e pasará o inevitable. Cun final que si será sorprendente e tremendamente simpático. Chama a atención nas ilustracións o verdadeiro protagonista do libro, a prenda de roupa, única nota de cor nas páxinas, que xuntos coas expresións divertidas dos animais, ou sorpresivas, fan deste sinxelo álbum un pracer literario. Un pracer xeneroso.

O gatiño nocturno

A editorial Lata de Sal publica dúas coleccións: "Vintage" (que sigo fielmente) e "Gatos" (que colecciona a miña amiga Mónica). Desta volta vouvos falar dun libro desta segunda colección, porque só ollar a portada xa namora. Tanto, que a compañeira de Plástica pediu que se mercase para a biblioteca. A verdade é que é unha auténtica pasada este álbum de Sonja Danowski titulado O gatiño nocturno. A esta ilustradora xa a admiraba polo seu traballo en O principio, publicado por Kalandraka, e aquí volve conquistar, sen dúbida ningunha. A historia é sinxela, o amor polos animais, o respecto, a solidariedade; sinxela pero conmovedora. Amor pola música, asemade, tanto que o libro remata cunha partitura, unha oferta especial.

Afortunadamente

Afortunadamente a editorial Lata de Sal decide recuperar este divertido álbum de Remy Charlip para a nosa lingua, Afortunadamente. Un libro que ademais de entretido resulta curioso e intrigante, pois cada páxina é unha nova aventura na que algo ocorre, "afortunadamente" (en cores alegres e vivas) ou "desafortunadamente" (en branco e negro); iso si, o protagonista non cae no abatemento e segue a súa loita no camiñar.

A casa do sono

Encantoume este álbum ilustrado de Audrey Wood e Don Wood que vén de publicar na nosa lingua a editorial Lata de Sal: A casa do sono chama a atención por varios motivos, polas ilustracións, dunha beleza extraordinaria e dunha ledicia contaxiosa, e polo texto, acumulativo -referente mundial desta lectura, seica- que resulta deliciosamente divertido. As cores do libro cambian dun xeito radical da primeira parte do texto á segunda, de cando durmen a cando espertan, sendo primeiro cores azuis e grises para convertérense en cores vivas e chamativas.

Quen se resiste a non pasalo ben coa lectura e logo a durmir???

As aventuras de Alicia no país das marabillas

A editorial Lata de Sal vén de publicar este precioso e pequeniño libro de As aventuras de Alicia no país das marabillas, unha reprodución do libro de 1907, a primeira adaptación orixinal en cor de Alicia que se publicou a precio de peto. A editorial infórmanos que é a única versión  en que Tenniel presentou a Alicia co vestido vermello. 

Esta é unha sexta parte do libro orixinal, unha adaptación para que o lectorado máis xove se achegase á súa lectura.

Unha pequena xoia que cabe nunha man.
Atopei esta foto no Twitter de Central Librera, para que vos fagades unha idea do tamaño:

 

Son un coello

Publica Lata de Sal en edición bilingüe galego-inglés este clásico de Ole Risom con ilustracións de Richard Scarry, Son un Coello, I am a Bunny. Un álbum que cumpre cinco anos, sinxelo, e que foi resultado dun tándem perfecto entre autor e ilustrador. Unha historia tenra que vén sendo contada por Nicolás un pequeno coello que unicamente desexa describir os seus momentos máis felices, dos que formas parte as flores ou as bolboretas. 

O paseo do elefante

Lata de Sal na súa colección Vintage recupera este álbum de Hirotaka Nakano, O paseo do elefante, publicado en 1968. Un álbum que destila felicidade nunha historia moi, moi sinxela: podedes pensar nun hipopótamo e nun crocodilo subidos a un elefante? Pois aquí os tedes! Pero claro, todo ten un límite. Cores suaves para animais delicados. Un día de paseo agradable.

O álbum de Adela

Dentro da colección "Vintage" da editorial Lata de Sal chéganos este álbum enormeee de Claude Ponti: O álbum de Adela é un libro que o autor fixo para a súa filla recén nada, un imaxinario sen palabras nos que aparecerán personaxes que logo desenvolverá nos seus libros; un mundo de diminutos e un bundo cheo de sorpresas que require unha detallada lectura a pesar de non ter palabras. Paseando polas súas páxinas veremos como conviven obxectos animados e inanimados entre os que parece non existir relación nin lóxica, pero cos cales poderemos inventar moitas historias, descubrindo como obxectos e animais cambian para construír un xogo máis alá das súas páxinas. Todo un derroche de maxín!

Lucía Cotriñas

Lata de Sal na súa colección Vintage proponnos este simpático e pequeno álbum de Anni M. G. Schmidt e Fiep Westendorp: Lucía Cotriñas. A escada. A súa autora foi merecente do Premio Hans Christian Andersen en 1988 e preséntanos un libro cheo de humor que nos pode lembrar a Pipi Calzaslargas e os contos que contabamos na nosa casa cando os nenos eran pequenos, polo que a min, particularmente, encantoume e encheume de morriña. Unha nena que non pode pasar moito tempo sen se luxar porque estar limpo significa estar quieto e iso é ben aburrido. E porque ademais, cada un é como é, e resulta ben difícil fuxir da natureza de seu. As ilustracións amosan as escenas tal cal, cun punto de humor e divertimento, ademais de crear uns personaxes moi expresivos.

 

Gatos de película

De todos os libros que está a publicar Lata de Sal na súa colección "Gatos" este foi o que máis me gustou: cine gatuno para pescudar os verdadeiros filmes que hai detrás. A que tal traballo nos facilita é Susan Herbert, quen nos propón un fascinante xogo con diferentes escenas de películas inesquecibles que debemos procurar na nosa memoria. Orixinalidade e enxeño mestúranse para crear unha obra singular e orixinal.

Desde logo, se vos gustan os gatos, este libro seravos indispensable. Se vos gusta o cine, o álbum procuraravos un divertimento. Fixádevos nestas ilustracións e comprobarédelo.

 

"Casablanca”, “Sorrisas e lágrimas”, “O que o vento levou”, "La dolce vita”....

Un hipopótamo na bañeira

Moito lle agradezo á editorial Lata de Sal esta súa colección "Vintage" onde vou descubrindo álbums ilustrados de hai anos que nunca ata aquí chegaran antes. E ademais, en galego. A perfección!

O libro que nos ocupa arestora é Un hipopótamo na bañeira de Kyoko Matsuoka coas ilustracións de Akiko Hayasahi (que sexan xaponeses é coincidencia temporal, a verdade). Un álbum cheo de fantasía e diversión que ao mesmo tempo destila tenrura e unha bañeira sorprendente onde todo cabe. Que máis se pode pedir?
Un álbum do ano 82 de dúas autoras consagradas en Xapón.

«A min encántame bañarme. Cando vou entrar no baño, sempre levo comigo o meu parruliño Pukka. A Pukka tamén lle encanta bañarse. Cando abro a porta soa… clic-clec-clac. O chan do baño é moi escorregadizo. Hai que ter coidado»

Un día de neve

Lata de sal, na súa colección Vintage, tráenos unha xoia do álbum ilustrado: Un día de neve de Ezra Jack Keats. E o bo é o que fai en galego ao mesmo tempo a en castelán! Un álbum que neste ano cumpre 50 anos. O libro chama a atención: en primeiro lugar vén acompañado dun cepillo de dentes: haberá que descubrir por que e onde se sitúa a relación. Logo anuncia que é o primeiro neno de cor que protagoniza un álbum ilustrado.
O libro obtivo a medalla Caldecott, premio que outorga a Asociacións de Servizos Bibliotecarios para Nenos.

 «Unha mañá de inverno, Peter espertou e mirou pola ventá. Nevara toda a noite. A neve cubríaotodo ata onde lle alcanzaba a vista». 

Un canguro polo Nadal

Descubrín hai pouco esta nova editorial Latas de Sal que na súa colección "Vintage" ten pensado publicar álbums coma este, escritos hai máis de 30 anos, e premiados nos seus países sen que nunca antes chegaran a España. A boa nova é que tamén están en galego!

Un canguro polo Nadal é de James Flora, e fala dun agasallo ben sorprendente. Un álbum divertido que nos arrincará máis dun sorriso. 

Agardamos por tanto as novidades da editorial!