Si decido quedarme

O outro día unha amiga, que estaba a pasar unha crise familiar, pediume que lle prestase libros alegres, para esquecer. Non creades que foi fácil. Outro compañeiro lembroume que sempre lle recomendo libros tristes. Non me dera conta. E agora, despois de chorar como unha toliña con este, doume conta de que, efectivamente, adoita suceder así. Pero non porque eu os recomende, creo, senón porque a maior parte dos libros contan situacións tristes, desas que non queremos vivir no noso día a día, desas que desexamos que non nos toquen a nós.

Cando menos, iso sucede con este libro. Si decido quedarme de Gayle Forman vai dunha difícil toma de decisión. Non podo contar nada, porque o pouco que puidese dicir sería como desvelar o libro, e nunca é esa a miña intención. Podo dicir, si, que está en primeira persoa, que o libro transcorre nun só día fraccionando o presente con lembranzas do pasado, e que a música predomina nas súas páxinas. O Amor é, creo, a parte esencial da novela, quen procurará a elección da protagonista.
Se o ledes, non esquezades ter un pano ao voso carón. Faravos falla.
Edita Salamandra.