Blogue de Gracia e de Anxo, blogue de pingas e de icebergs, do que nos preocupa ou nos chama a atención, de biblioteca e de aula.

13/10/11

O álbum na literatura infantil e xuvenil (2000-2010)

A verdade é que tan pronto souben da súa publicación, procureino. E dende aquela ábroo case todos os días, para aprender un pouco máis e para coñecer álbums dos que non sabía sequera a súa existencia.
Coordinan o volume publicado por Xerais Blanca-Ana Roig Rechou, Isabel Soto López e Marta Neira Rodríguez: O álbum na literatura infantil e xuvenil (2000-2010) preséntase baixo a Rede temática 'Las Literaturas Infantiles y Juveniles del Marco Ibérico e Iberoamericano' (LIJMI). Un estudo para reflexionar sobre eses libros que tanto amo: os álbums ilustrados. Eses libros que non son só infantís e o demostran cada día máis e máis títulos sorprendentes.
O libro comeza cun estudo que expón as características do álbum e as súas orixes. Logo aprenderemos tamén sobre a produción artística dos álbums e tamén hai unha "Selección de álbums inesquecíbeis" así como unha "Selección para a educación literaria" que deixan constancia -moi ao meu pesar- da cantidade de álbums que descoñezo.
Ocupa a maior parte do libro os "Comentarios para a formación lectora" onde se repasan un por un moitos libros que existen en todas as linguas do estado, pero non todos están, desgrazadamente, traducidos á nosa lingua.
O libro enteiro é un manual imprescindible para quen queira achegarse a este mundo e para darlle a importancia que merece ao álbum, malia que moito profesorado de secundaria pense que só son libros de infantil que non teñen cabida nos seus centros de ensino.
Un defecto de edición: creo que é unha mágoa que as imaxes non teñan outra nitidez, xa non a cor, senón que se vexan máis claras, posto que as ilustracións recollidas e as portadas perden moito na calidade que se lle deu na impresión final.

Sen comentarios

Neste blog utilizamos as imaxes con finalidade educativa. Se algunha delas estivera suxeita a dereitos de autor, rogamos que vos poñades en contacto connosco para retirala de inmediato.