Praga mortal

A última entrega de Philip Kerr ambientada na Alemaña nazi é este Praga mortal publicada por RBA. Na súa liña, o autor ofrece unha boa mestura de novela histórica e novela negra que a min engánchame desde o comezo. E que ademais un dos personaxes principais desta historia sexa o maldito Reinhard Heyndrich, ese que maxinou o holocausto, dálle un toque á novela que non teñen outras novelas do seu xénero. O protagonista, Bernie Gunther, é un dos meus detectives predilectos. Un home que tenta sobrevivir a todas as miserias que o rodean, que tenta soster as súas ideas negando o nazismo, un nazismo que o asolaga no inferno.

A obra sitúanos en 1941, no momento en que Heydrich é nomeado gobernador de Bohemia e Moravia. Arredor del xirará a trama da obra. Unha trama que rende tributo a Agatha Christie! Así, Gunther terá que facer de Poirot e sobrevivir no inferno, non pode chamarse doutro xeito ao ambiente que se respira entre nazis. E neste ambiente despregará o seu humor máis acedo. No medio do fume dos cigarros, da fame da poboación, da provoacións dos asasinos, da crueldade e da loucura, hai momentos para o amor e para o sorriso. Hai momentos para a reflexión. E mesmo para a comparación. Que sucedería se...?

Non é para min a peor das súas entregas. Aínda que a súa triloxía berlinesa sexa insuperable, esta obra paréceme boísima. Recoñezo que me sigo a sorprender coa crueldade da que é capaz o ser humano, e máis coa crueldade desa época histórica chamada nazismo.