Un faro na escuridade

Agardaba con ilusión a segunda entrega d' O mundo secreto de Basilius Hoffman de Fernando Cimadevila con ilustracións de Iván Valladares publicado por Urco. Esta segunda entrega, aínda que a min gustoume menos cá primeira polo que supuxo aquela de sorpresa e agrado no panorama da nosa literatura, non a desmerece. Seguimos nese mundo estraño, fantástico e ben complexo creado para que o profesor Hoffman guíe ao seu sobriño coa fin de conseguir unha revelación abraiante que marcará o destino da Humanidade. Para min, o malo de ler segundas partes é que tiña que relembrar anacos esquecidos do primeiro libro para confluílos e entender o que aquí ocorre, o que me supón un exercicio extra, ademais de resolver misterios que na primeira entrega quedaran inconclusos, pero sei ao rematalo que volverá a ser un éxito entre o alumnado. Iso si, teremos novamente que agardar a terceira parte para seguir comprendendo este mundo creado por Fernando e que Iván nos vai debuxando de cando en vez.
Moitísimos parabéns a ambos, segue a ser unha literatura fantástica que ben nos cumpría e prognostico que seguirá a ter tanto éxito coma a anterior. Eu, desde logo, recoméndovola. Porque as páxinas pasan axiña, moi axiña, e o libro vaise devorando sen sentir que estás a comerte máis de trescentas páxinas sen sobremesa.