Este mes vénnos a nosa colaboradora Carme moi artística e recoméndanos este libro de Kalandraka do ano 2008. Xa nin dou as grazas, pura mala educación!
Descubrir a arte a través do mundo, de Caroline
Desnoëttes e publicado por Faktoría K, é unha desas alfaias que tod@s deberiamos ter nos nosos andeis. Dezaoito
obras de arte dos cinco continentes: miniaturas iranianas, rolos chineses,
vasos de terracota peruanos, máscaras brasileiras, biombos coreanos… que se
presentan nunha edición coidada ata o último detalle e apta para calquera idade.
Nas diferentes
presentacións, podemos ir levantando e descubrindo lapelas, baixo as cales
atoparemos información sobre o país de orixe das mostras artísticas, imaxes
típicas de cada un, así como suxerencias para traballar, con distintos
materiais, a partir das pezas orixinais. Ao remate, na galería, ofrécese unha breve análise das obras, xunto coa
indicación do espazo onde se expoñen actualmente (Louvre, Museo Británico…)
Unha marabilla para
ollar, xogar, coñecer, crear e… moi válida para levar ás nosas aulas e ir
espertando sensibilidades.
Sen comentarios
Publicar un comentario