¡No pasarán!

Gustoume menos do que pensaba e máis do que me dixeron este ¡No pasarán! de Vittorio Giardino, en edición integral publicado por Norma. Situada na nosa Guerra Civil, Max Fridman, escritor xudeu, terá de vir a buscar un compañeiro seu das Brigadas Internacionais. Na maraña que supón a guerra, envolverase en intereses e traicións das que non se libran nin un nin o outro bando. O mellor da lectura é o argumento ben trazado e interesante que nos mantén na súa procura até rematalo, aínda que se bota en falta o desenvolvemento dalgúns personaxes ou o final abrupto do inicio de relación entre o protagonista e a xornalista. Coido que a crueza que supón calquera guerra, pero máis unha guerra civil, queda ben plasmada no cómic. O debuxo paréceme realmente impresionante, constituíndo o valor máis seguro da obra que temos nas mans.

A edición integral inclúe varias páxinas extras, con deseños dos personaxes, partes de guión eliminadas, fotos e documentación, mesmo unha introdución do autor.