Celso Emilio, ferreiro das palabras aceirudas

Flipada quedei con este extraordinario traballo que vén do IES de Chapela. Xa coñeciamos do seu labor grazas a aquel marabilloso vídeo "Eu falarei" e agora  volven a arrasar a rede con este vídeo elaborado polos alumnos de 3º de ESO dirixidos polo Profesor Miguel Pérez. Logo de facer unha selección de poemas coa obxectivo de cubrir as distintas etapas da vida do poeta e da súa obra, traballouse co alumnado a comprensión e o recitado dos textos na clase de Música, graváronse as súas voces e finalmente engadiuse música e imaxes a todos os versos. Este documental comenza co son da máquina de escribir do poeta e contínua co recitado dunha escolla dos seus poemas, e continúa o recital nun marabilloso documental de hora e cuarto ata un imperdible final na praia de Arealonga. "Chapela deitada frente ao mar, as súas palabras aceirudas, transcenden a súa morte, porque nin a morte nin a inxustiza acalan nunca a verdade, tal e como a dixo o poeta".

Moitísimos parabéns a estes traballadores do ensino público que dan unha lección de xenerosidade e bo facer, xunto coa admiración rendida ante un traballo colaborativo desta grandeza.