Blogue de Gracia e de Anxo, blogue de pingas e de icebergs, do que nos preocupa ou nos chama a atención, de biblioteca e de aula.

05/08/13

Demo de dente!

Unha das novidades que nos ofrece OQO é este álbum de Pep Bruno ilustrado por Amrei Fiedler: Demo de dente!. Un libro sobre canto método se pode utilizar para facilitar a caída prematura deses dentes que bailan na boca pero que non se deciden a caer por si sós. Claro que aquí toparedes unhas solucións ben divertidas e estrambóticas, tanto que eu case aconsellaría non seguir as súas indicacións de uso, non vaia ser! (cando menos o da bici ten os seus riscos...). Para cando se procure diversión na casa, hai a posibilidade de escoller o método entretido, e ese si que está claro que o é.
Desde logo, encantoume a proposta, imposible non debuxar un sorriso na face do lector mentres maxina cada unha das posibilidades que este libro nos ofrece. O mellor é o resultado: o dente acaba por caer, antes ou despois. Así que mentres agardamos podemos seguir utilizando o álbum como libro de consulta, aínda que non o practiquemos. Como podemos observar na última ilustración, a historia seguirá acompañada dun rato... e a ver que pasa!
As ilustracións son para pararse, posto que están cheas de pequenos detalles que haberá que repasar con lentitude, posto que cada detalle conta.

Sen comentarios

Neste blog utilizamos as imaxes con finalidade educativa. Se algunha delas estivera suxeita a dereitos de autor, rogamos que vos poñades en contacto connosco para retirala de inmediato.