Puntualísima, a nosa prezada colaboradora Carme recoméndanos un fermoso libro:
Que importante o inicio dunha novela! Cando lin como comezaba La historia del amor (Salamandra, 2002), de Nicole Krauss, pensei que este libro había pagar a pena, e así foi.
Quen se pode resistir a este comezo: “Cuando
escriban mi necrológica. Mañana. O pasado. Pondrán: Leo Gursky ha muerto. Deja
un apartamento lleno de mierda”.
Que acontece en La
historia del amor? Aínda que o amor artella toda a trama , tamén teñen o
seu espazo o desamor, a memoria, a perda, a soidade, a ensoñación, a amizade, a
traizón, a envexa…Ademais, asistimos a todo un exercicio metaliterario, onde se
describe a viaxe do libro co mesmo
título, escrito por Leopold Gursky. Este ancián, cerralleiro de profesión e residente en New York, abandonou a Polonia
ocupada polos nazis, deixando alí ao seu grande amor, Alma Mereminsky. Será
outra Alma, esta vez Singer, quen a busque moitos anos despois para atoparlle
sentido á historia dese libro que o seu pai atopou nunha librería bonaerense e do que súa nai, tempo despois, recibe o
estraño encargo de traducir. Catro historias superpostas onde as vidas de todos
os personaxes (Leo, Zini Litvinoff, Jacob Marcus,Bird, Isaac Moritz, David e
Charlotte Singer…), aparentemente sen ligazón, acaban converxendo de xeito,
algunhas veces, previsible (porén, isto non impide que nos teña en ascuas a
maior parte da lectura).
Literatura e vida en
estado puro, o azar como compoñente fundamental da existencia humana e o
recurso da ironía presente a cada paso. En definitiva, déixase sentir o alento
austeriano en moitas das súas páxinas. Pero isto non é un engadido
reprobatorio, pois a autora consegue que, notándose a influencia, esta non se
convirta en simple imitación, quedando o lector/a co desexo de seguir lendo a
súa obra. La gran casa, a súa
primeira novela, que Gracia reseñou hai tempo ofrece boas perspectivas, non vos
parece?
Sen comentarios
Publicar un comentario