Blogue de Gracia e de Anxo, blogue de pingas e de icebergs, do que nos preocupa ou nos chama a atención, de biblioteca e de aula.

17/03/14

Non impartimos cursos Celga


Hoxe recibimos unha chamada do Gabinete de Normalización de Pontevedra, dependente da Consellería de Educación, ofrecéndonos a impartición dos cursos Celga que se programan na Estrada.
Velaí que a Consellería deixa de ofrecer os cursos preparatorios Celga ao profesorado en paro e cos que segundo o informe da Inspección de Traballo mantén unha relación laboral. Concretamente, a Inspección Provincial de Traballo da Coruña, despois dunha inspección á Secretaría Xeral de Política Lingüística, comprobou que o profesorado que viña impartindo os cursos Celga non estaba dado de alta na Seguridade Social, non se cotizaba por el como corresponde e non tiñan recoñecidos os seus dereitos laborais. En consecuencia a Xunta terá que asumir unha forte sanción económica e debería reformar a escurantista metodololxía de contratación coa que actúa.
A Coordinadora de Traballadores de  Normalización da Lingua (CTNL) fixo unha proposta para a mellora da planificación dos Celga na que incluía a creación dunha lista pública e transparente de profesorado colaborador na que se valorara  obxectivamente a experiencia e a formación para a impartición destes cursos e se abrira o camiño á profesionalización no sector.

En vista do exposto, considerando que esta forma de realizar contratos para a adminstración pública carece da transparencia e as garantías necesarias,  e en solidariedade co profesorado especializado na formación de galego para a acreditación Celga, rexeitamos o ofrecemento da Consellería.

1 comentario:

María dixo...

Grazas polo voso apoio ante esta inxustiza propia do feudalismo! !

Neste blog utilizamos as imaxes con finalidade educativa. Se algunha delas estivera suxeita a dereitos de autor, rogamos que vos poñades en contacto connosco para retirala de inmediato.