Desta volta, a nosa prezada colaboradora Carme vén cun libro que seguramente coñecedes. Se non o lestes, é hora de facelo. Cando menos, despois de ler as palabras de Carme cremos que hai que lelo xa.
Graciñas, Carme, por vir novamente!
Futuro imperfecto (Galaxia
2010), de Xulia Alonso, é un deses
libros que non se deben deixar pasar, e ben o soubo captar o alumnado que lle
concedeu o XVII Premio San Clemente, alá polo 2011. É unha historia
autobiográfica, contada en primeira persoa, por unha das protagonistas, Xulia,
quen afirmou nunha entrevista que estamos ante un “libro subxectivo e moi
persoal”. Ao longo das súas máis de duascentas páxinas asistimos á memoria do
pasado íntimo e familiar, pero tamén histórico (primeiros anos da democracia).
Moitos dos seus capítulos veñen
introducidos por versos de Lois Pereiro, pois contánsenos uns anos de amor e
sufrimento, de loita e supervivencia, onde dous mozos, Xulia e Nico, tras
coñecérense, inician en Santiago unha travesía que eles soñan que sexa de
liberdade, que os leva a querer vivir ao límite, e que os acaba conducindo á heroína. En palabras da escritora, definía esta
etapa como aquela na que “cheguei a Santiago para loitar pola miña
independencia e perdina alí: fíxenme dependente”. Esta droga, como a tantos e
tantas daquel tempo, empuxou a moitos desta xeración ata a SIDA. Tamén
contemplamos nesta obra as consecuencias e avance desta enfermidade, que finalmente
leva a un deles á morte, episodio do que se parte, sendo a narración unha explicación
e unha revisión dos anos que acompañaron ata ese
remate.
Pero toda esta historia está
tecida con distintas redes: a dos afectos inquebrantables (e non só o da
parella, senón tamén o da familia e as amizades, o de Lucía e o seu rebulir), a
esperanza, o agradecemento, a lembranza dos antergos, a profesionalidade e
cariño do equipo médico...
Magnífica e inesquecible. Grazas
sempre, Xulia.
“Queriamos ser transgresores, necesitabamos marcar distancias coas
xeracións pasadas, coas nosas familias, intervir activamente no remuíño de
cambios que se producían en cadea, imparables, ou polo menos pensabamos que era
un proceso imparable, que eramos imparables. Eu sentíame imparable. Caemos na
trampa á primeira, paráronnos en seco á primeira, que eficiencia! Porque a
transgresión só é eficaz se resiste, se perdura no tempo, se hai supervivencia.”
1 comentario:
Dende logo ten moi boa pinta polo que contas, lamentablemente nesas èpocas perdimos a moita xuventude que foise despóis de caer nas drogas. Vouno anotar na listan sen fin de libros por leer. Un saudo
Publicar un comentario