Este título tan longo é o escollido por Janosch para agasallarnos cunha nova aventura destes personaxes tan entrañables que publica a editorial Kalandraka: Eu curareite, dixo oso pequeno presenta a doenza de tigue pequeno que requirirá os coidados máis cariñosos do seu amigo oso pequeno. Porque cando un enferma precisa mimos, e entre amigos isto é ben doado. Ou cando menos iso é o que nos amosa Janosch cos seus personaxes, onde a amizade é o valor máis digno que se pode ter. Todos os veciños amosan esta mesma actitude, e solidarízanse coa dor -ollo ao humor presente sobre todo no hospital!- dun dos seus amigos, porque estar enfermo é o peor que a un lle pode pasar. E si, valoremos entón que a Amizade, con maiúsculas, é necesaria e debemos apreciala por riba de todo.
Un autor que destaca pola súa habilidade de imprimir tenrura combinada con humor nos seus libros, de que aquela saiba espertar emoción no lector e de que sutilmente os nosos beizos debuxen un sorriso calmo. Porque a historia tamén require iso, a calma de ser contada en alta para poder gozala en plenitude.
Como non imos curar lendo historias así?
Sen comentarios
Publicar un comentario