Lo que escucha la lluvia

 A editorial Periférica publica Lo que escucha la lluvia de Francisco Solano. Non estamos ante unha lectura lixeira, senón todo o contrario: sentar a ler este libro precia de momentos intensos, lentos, deixando que o calor que nos abafa este verán escorregue para permitir unha concentración necesaria. As palabras do libro flúen discretamente, paseniñamente, cara a un só fin. E con elas, nese discorrer discreto, o lector asegura unha lectura contundente, sen pausas, sen dilación, sen diálogo. Un monólogo constante dunha voz que interpela ao lector/a, que fala da memoria, que xoga coa nosa proximidade, que se amosa xoguetona porque nos ensina e nos tapa a súa realidade. Porque verdade e mentira son caras da mesma moeda. Así é a ficción, a Literatura. A Palabra.