Sandra ama a Meike

Desta volta, a colaboración inesperada vén dunha das miñas mellores alumnas deste curso. Cristina Costela de 3º de ESO forma parte do club de lectura. Comezou o seu verán lector con este libro que nos quere recomendar: Sandra ama a Meike de Marliese Arold, publicado por Lóguez.

Sandra ama a Meike é un libro que  trata sobre a homosexualidade, e é un libro moi realista. 

   Este libro enganchoume dende o momento en que lin a primeira páxina; nel, a amiga de Sandra e a demais xente esperan que Sandra se namore de Thomas e empecen unha relación, pero Sandra só o ve como un amigo, máis cando coñece a Meike e comeza a estar confusa, non sabe se se namorou de Meike, daquela ollada... Pouco a pouco fóronse coñecendo e Sandra tiña ganas de estar con ela, de vela… entón deuse conta de que descubrira outra forma de amar. Meike confesoulle que lle gustaban as mulleres e Sandra díxolle que tamén, polo que comezaron unha relación.

  Sandra saía mais con Meike que coa súa amiga, á quen non lle dixera nada, polo que se foron distanciando.

  Sandra tiña medo de contalo, de se o aceptarían, de como a ían tratar... pero un día contoullo a súa amiga e ela enfadouse e díxolle que lle comeran a cabeza, que o que tiña era unha enfermidade.

Eu non o vexo así, cada un é libre de decidir a quen quere amar e de que maneira, que máis dá que che gusten os homes ou as mulleres, o principal é ser feliz  cunha persoa que te trate ben, independentemente do seu sexo; se eu tivese algún amigo ou amiga homosexual aceptaríao e defenderíao, porque tamén hai que ter valor para dicilo nesta sociedade, que aínda non acepta isto. Debemos cambiar esa visión con libros coma este.

  Recoméndollo a todo o mundo, un libro fácil de ler e que che fai ver que a homosexualidade non é nada malo, senón outra forma de amar.