...e os domingos, un croissant

Tiña unhas altísimas expectativas sobre este libro de Ursula Heinze de Lorenzo, ...e os domingos, un croissant. Diario dun encontro coa vida  publicado por Alvarellos editora. que non se cumpriron, pero aínda así resultou unha lectura interesante porque fala dun momento concreto, dunha volta á vida, dunha loita constante. Falamos dun diario que escribe ao longo de dous meses ingresada no sanatorio psiquiátrico “La Robleda”, preto de Santiago de Compostela. A importancia do libro vén dada porque con el dáse un paso máis para romper un estigma que temos de noso, o tratamento dos problemas psiquiátricos. Asemade, fala sen complexos dos problemas da súa reclusión que da importancia que teñen os afectos para a recuperación. O libro é, pois, un diario de si mesma pero tamén unha descrición de acontecementos e dos problemas das persoas que alí están, así como o enxalzamento de empregados que están para axudar continuamente.

Un libro que axuda a abrir os ollos a unha realidade que temos ao noso carón, que fala da conversa, do riso e mesmo da importancia da ironía para saír adiante.