Blogue de Gracia e de Anxo, blogue de pingas e de icebergs, do que nos preocupa ou nos chama a atención, de biblioteca e de aula.

11/06/16

Poemar o mar


Só Antonio García Teijeiro podería atreverse a Poemar o mar e saír navegando sobre as ondas orgullosas de seren poesía mentres Xan López Domínguez pinta o mariñeiro poeta que publica en Xerais. O mar, o noso Mar, misterio e tradición, reflexo de versos espidos, é concibido como emoción, como riqueza, como esforzo, como músic, como ritmo que resalta o onírico e o real. Todos os mares nun, para nos salvar, para darnos memoria, para darnos historia, para agasallarnos o brillo do sol e a música da lúa. García Teijeiro xoga cos grans de areas porque son palabras, cos gotas mariñas porque son rimas, con peixes porque son versos, e dálle forma a un libro cociñado con sal mariña. Lemos poemas e cantamos cancións, lemos versos e cantamos notas. Poesía e música veñen a se tornar en máxicas palabras con sabor salgado e dunas mariñas. Rochas que se moldean, barbas que se peitean. O mar é poesía e o home é poeta. Poeta de nenos e nenas que serán contaxiados con estes versos do pracer íntimo e común de sentir as cóxegas das palabras nos seus beizos.




Sen comentarios

Neste blog utilizamos as imaxes con finalidade educativa. Se algunha delas estivera suxeita a dereitos de autor, rogamos que vos poñades en contacto connosco para retirala de inmediato.