Premio Príncipe de Asturias

O escritor israelí Amos Oz (Xerusalén, 1939) foi galardoado co Premio Príncipe de Asturias das Letras 2007, en recoñecemento á "defensa da paz entre os pobos" que fai a súa obra. O xurado destacou que Amos Oz contribuíu a facer da lingua hebrea un brillante instrumento para a arte literaria e para a revelación certeira das realidades máis acuciantes e universais do noso tempo; tamén valorou "a denuncia da todas as expresións do fanatismo" presente na súa obra.

A vida e a obra do escritor está marcada por unha busca da aspiración poética, herdada da súa familia, emigrantes rusos e polacos, e polo afán de entendemento entre xudeus e palestinos.

A "SEDE" para contar historias tópaa na súa casa do deserto do Neguev; se lle preguntan unha palabra para definir o que escribe, contesta "familia"; se lle preguntan dúas, precisa "familias infelices". Mergúllase na lama do pasado. Eliminou o seu apelido Klausner e quedouse con Oz, que significa coraxe. Fillo único dun home que sabía case vinte idiomas pero que quixo que Amos só aprendese hebreo para que non o contaminasen. A súa nai suicidouse cando o neno apenas tiña trece anos. El non o superou e deixou a seu pai para vivir nun kibutz. Coñeceu a guerra e apostou pola paz.

É elegante no verbo. E mestre no humor e o paradoxo. Escribe coma un poeta a quen os poemas lle saen longos. Está contra o fanatismo e pola paz. Parece un gato pero pode ser unha panteira.

Una historia de amor y oscuridad é a súa gran novela, á altura de Llámalo sueño de Henry Roth.
Se vos gustan os libros de memorias, as sagas e as historias da Historia, invítovos a viaxar por este libro. Léndoo coñeceredes e emocionarédesvos coa historia dos Oz, unha familia xudía de orixe europea, ao longo do convulso século XX.

E é que di o autor que non hai mellor axencia de viaxes que a literatura, porque a través dela viaxamos a través do espazo e do tempo, e penetramos nas casas e nos corazóns.