El niño con el pijama de rayas, o filme

Sinceramente, tíñalle bastante medo ao visionado deste filme, non só porque ver unha película despois de ler un libro é normalmente un fracaso, senón pola propia trama en si mesma. Por suposto, o bo do libro, o final (o resto non me parece como para tanto éxito), é sabido, polo que me interesaba saber como o director, Mark Herman, tiña pensado ofrecérnolo. E é, desde o meu punto de vista, o mellor da cinta. O resto é un pouco frío, pero non sei se habería moitas posibilidades de destacar a inxenuidade do neno ante os acontecementos doutro xeito. Aínda que eu non me acabo de crer que un neno sexa tan cego, igual me ocorreu ao ler o libro. En fin.
Agora agardo os comentarios do alumnado de Diver, para saber que lles pareceu a eles, porque nunca estiveron tan calados, polo que intúo que debeu ser un éxito.