Desde o ILG

O Instituto da Lingua Galega da Universidade de Santiago advirte a Feijoo de que as actuacións do seu Executivo supoñen un serio retroceso na extensión do coñecemento do galego e na súa implantación na sociedade, na administración e no ensino, causando un dano gravísimo ao prestixio social da lingua galega. Fai fincapé en que se difunden desde as máis altas instancias as falsas ideas de que o galego é lingua só dunha parte da cidadanía e de que existe un proceso de imposición que discrimina os castelán-falantes. Lembra que o Consello de Europa chamou a atención sobre a insatisfactoria situación do galego no ensino, a discriminación que sofren os galegofalantes no sistema xudicial e a situación de marxinación nas empresas que prestan servizos públicos en Galicia.
Insta ao Goberno a promover a lingua en todos os eidos cumprindo a lexislación vixente e destaca que se debe impedir que a lingua se convirta en motivo de conflito.