As autoridades israelís deportaron a primeira hora deste martes ao clown galego Iván Prado, director do Festiclown en Galicia durante os últimos dez anos e do colectivo Pallasos en Rebeldía. O artista viaxaba acompañado por unha compañeira para organizar o Festiclown 2010 que se vai desenvolver en outubro deste ano en Cisxordania, nos Territorios Ocupados de Palestina. O evento ten coma obxectivo aliviar cun espectáculo de pallasos as penurias dos nenos que sofren diariamente a brutalidade da ocupación.
Ambos os dous aterraron na tarde do luns en Tel Aviv a bordo dun avión da compañía israelí El Al. No control de pasaportes do aeroporto israelí foron interceptados por varios axentes que os conduciron a un cuarto na área de tránsito do aeródromo. A seguridade do aeroporto de Ben Gurión interrogounos durante seis horas ao atopar "sospeitoso" que a súa compañeira de viaxe tivese un apelido árabe. Durante este tempo, a policía retiroulles os seus pasaportes e cacheounos até en tres ocasións. Por volta da medianoite do luns, foron trasladados a un centro de internamento para inmigrantes fóra do recinto aeroportuario preto de Tel Aviv, onde permaneceron retidos en celas invididuais durante seis horas. Logo, foron devoltos ao aeroporto para embarcar rumbo a España. As autoridades israelís aduciron que a súa deportación débese a "razóns de seguridade".
Á súa chegada ao aeroporto de Barajas, Iván Prado tentou interpoñer unha denuncia pola súa deportación, que non foi admitida polos axentes da comisaria do aeródromo. A expulsión en Israel impide a entrada durante cinco anos. O país hebreo é a única porta de entrada tanto a Cisxordania coma a Gaza.
A expulsión do clown galego prodúcese días despois de que o ministro de Exteriores español, Miguel Ángel Moratinos, pedise explicacións ao seu homólogo, o ultradereitista Avigdor Lieberman, pola aprobación da lei do 13 de abril que permite a deportación en masa de palestinos e estranxeiros dos Territorios Ocupados por ordes militares. Moratinos tamén instou a Lieberman a que permita traballar aos cooperantes estranxeiros, aos que só se lles concede visado de turista, polo que se ven obrigados cada tres meses a deixar o país e volver entrar para renovar as súas visas. A súa admisión é discrecional e depende habitualmente do criterio da policía de fronteiras ou da seguridade do aeroporto de Tel Aviv. A nova lei militar dá carta branca ao Exército israelí para deportar os traballadores humanitarios en Cisxordania.
Máis información aquí.
Sen comentarios
Publicar un comentario