Blogue de Gracia e de Anxo, blogue de pingas e de icebergs, do que nos preocupa ou nos chama a atención, de biblioteca e de aula.

15/05/10

Milu

A Convención sobre os Dereitos da Infancia recoñece que todos os nenos e nenas teñen dereito a medrar nunha familia. Porén, en España hai máis de 15.000 rapaces que carecen dese dereito e viven en centros de menores, moitos deles sen apenas contacto coas súas familias biolóxicas. Nos seus 14 anos de traxectoria, a Fundación Meniños atendeu unhas 6.000 familias e uns 9.000 menores, dos cales un milleiro pertencen ao balance de actuacións do pasado ano. Como dixo Manuel Rivas na presentación de Milu, a Fundación Meniños é “un lugar onde se produce harmonía, un lugar de rescate, de esperanza”.
Esta é a presentación deste libro que ilustrado por Aitana Carrasco nos ofrece Kalandraka. Está garantido, pois, que a súa compra é un acerto: porque contribuiredes cunha ONG, porque o texto é dun gran escritor, porque a edición é outra marabilla máis, porque as ilustracións son xenerosísimas.


Do blogue de Kalandraka:

“Milu” relata as vivencias dunha nena en apuros: cando o seu pai deixa de cantarlle cancións e a súa nai deixa de ter expectativas, unha pequena televisión convértese na súa única compaña. Milu é a voz de moitos nenos e nenas que non poden gozar do seu dereito a vivir en familia; pero a súa historia lémbranos que hai lugar para a esperanza.

Manuel Rivas, que lle cede os seus dereitos de autor desta obra á Fundación Meniños, crea un relato tenro e sensible que amosa a indefensión de Milu ante os problemas dos seus pais. Aitana Carrasco tamén colabora coa Fundación Meniños cedéndolle a imaxe da protagonista; nas súas ilustracións coloristas mestúranse estampados, texturas e gravados antigos, creando ambientes realistas con elementos oníricos.


Sen comentarios

Neste blog utilizamos as imaxes con finalidade educativa. Se algunha delas estivera suxeita a dereitos de autor, rogamos que vos poñades en contacto connosco para retirala de inmediato.