Blogue de Gracia e de Anxo, blogue de pingas e de icebergs, do que nos preocupa ou nos chama a atención, de biblioteca e de aula.

15/05/10

La casa

Non sei como vou falar deste libro que non é un libro senón unha obra de arte en si mesma. Abrilo, percorrelo coa mirada, acariñalo, sentilo, extasiarse, é todo un. Porque é deses libros aos que volves unha e outra vez, e de cada volta atopas un algo novo no que non repararas. Porque as ilustracións son tan minuciosas, tan delicadas, tan perfectas, que semella incrible que un libro poida proporcionar extraordinario pracer.
Falo de La casa de J. Patrick Lewis e ilustracións de Roberto Innocenti. Publicado por Kalandraka. Un defecto: non está en galego. Preguntei as razóns, pero a confusa resposta aludía aos dereitos. Aínda que esta mesma editora ten deste mesmo ilustrador (aprendede o nome!) As aventuras de Pinocho, outro deses libros que hai que ter para acariñar de cando en vez.
A historia, ademais, é moi fermosa: a evolución dun fogar ao longo do século XX. Coma se dunha persoa se tratase, poderemos contemplar os seus cambios, a soidade, a riqueza, a tristura, a guerra, o abandono... E digo "ademais" sabendo que cando abrades o libro veredes que repararedes posteriormente nas letras: o máis impactante son as ilustracións.
Unha xoia.

1 comentario:

Anónimo dixo...

Aquí hai pura arte, con estas imaxes xa non fai falta case un texto que as anime. Contan tanto...

Neste blog utilizamos as imaxes con finalidade educativa. Se algunha delas estivera suxeita a dereitos de autor, rogamos que vos poñades en contacto connosco para retirala de inmediato.