La cena

A lectura deste libro deixoume totalmente estarrecida. Cando o rematei de ler apoderárase de min tal anguria que case non o podía crer. E converteuse nun deses libros que dis aos que tes derredor: "tes que lelo". Tedes que lelo porque necesito compartilo convosco. Necesito falar del, derrubar ese muro que as palabras que tecen a historia deste libro construíron diante miña, procurándome pensamentos fatalistas.
Si, La cena de Herman Koch é así de contundente. Editado por Salamandra, foi Premio do Público no seu país, Holanda, e elixido Libro do ano 2009. Non estraña.
Demoledora crítica á sociedade actual, a esa clase media na que tod@s nós nos enmarcamos, non deixa títere con cabeza.
E o peor: inspirado nos feitos reais que tiveron lugar en Barcelona no ano 2005 cando dous mozos, fillos de familias acomodadas, foron condeadeados por queimar unha indixente que durmía nun caixeiro.
Os personaxes están tan ben construídos que semella que non lle deron apenas traballo ao autor. Só cunha cea sabemos a que tipo de persoas nos enfrontamos. E cada páxina serve para nos horrorizar máis, preguntándonos que tipo de moral estamos a crear nesta nosa sociedade, preguntándonos mesmo cal sería a nosa reacción se vivísemos unha situación semellante. Preguntándonos se hai remedio para tanta crueldade disfrazada.
Implacable, chea de ironía, mesmo dunha dose de humor que cómpre de cando en vez.
Un libro que, sinxelamente, tedes que lelo. E cavilalo.