Inolvidable

Encantoume este cómic de Alex Robinson, Inolvidable publicado por Astiberri. Falamos ben deste autor algunha vez máis, porén quédome con esta novela gráfica.

Xa chama a atención a portada, imitación dunha caixa de cigarros. E logo sorprendémonos ao lelo e buscar o xeito de deixar de fumar do protagonista: o regreso ao pasado serve para atopar o primeiro contacto co mundo do tabaco e servirá asemade para reflexionar sobre pasado e presente, sobre oportunidades que deixamos pasar e que non poden volver, sobre cambios que nos gustaría realizar pero que a vida non permite, sobre un futuro que desexariamos tornar pero que é un soño imposible. E todo isto adobiado con moito humor.
Un cómic moi recomendable en branco e negro, como a vida, que ás veces permite a cor e outras a agocha. Ademais, sinala moitos temas de xeito conciso, de aí a brevidade do libro, que mece recordos e melancolías e que nos procurará pensar na nosa propia adolescencia.