Divina Providencia

Unha novela lixeira de fácil lectura, Divina Providencia de Valérie Tong Cuong, recomendable para pasar unha tarde de chuvia sen máis pretensións que a do optimismo. Porque disto está cargado esta novela amable que fala das casualidades da vida e as segundas oportunidades: segundas oportunidades para seren felices os cinco personaxes que deambulan entre as liñas do libro lembrando unha vida máis chea de tristura e fracaso que o futuro ou a divina providencia ou a sorte será a encargada de trocar. Porque o destino unirá os seus pasos afastados que vagan por unha gran cidade sen posibilidade de encontrarse nun hospital que cambiará as súas vidas para sempre.

Quizais o máis interesante da novela sexa que a pesar da súa brevidade, a autora é quen de nos reseñar o máis importante das vidas dos personaxes principais, situando o lector nun plano omnisciente que o dispoñerá a saber as reaccións de cada un deles; e adobiado con todo tipo de temas espiñentos como enfermidades terminais, atentados, malversacións...
De todos os xeitos, semella unha historia pouco crible con demasiadas casualidades que rematan como pinga que colma o vaso nun final tan feliz como incrible. O último capítulo é xa un conto de princesas!