Cor animal

Este libro vai ser, sen dúbida ningunha, o próximo agasallo que lle faga ao meu Breixo, o neno que máis sabe de animais do mundo... que eu coñezo. Cor animal é un álbum publicado por Kalandraka con texto de Agustín Agra e ilustracións de Maya Hanish. Dende as bibliotecas escolares sempre estamos a demandar este tipo de libros, libros de ciencia en galego, que acheguen ao lectorado máis novo conceptos e ideas das ramas das ciencias na nosa lingua. Este álbum é un máis que debemos ter nas bibliotecas escolares, por tanto, para coñecer as habilidades, costumes e curiosidades dalgunhas especies que o libro propón: candorca, oso polar, cebra, guepardo, llama, pantera negra, tigre de Bengala, flamengo, faisán dourado, guacamaio escarlata, tucano, quetzal, cálao, tunqui, mascato de patas azuis, diamante de gould e varios máis que chaman a atención por pouco coñecidos... cando menos para min: seguro que o meu Breixiño haos coñecer todos! Estou desexando que o teña nas mans!

A carón destes textos, unhas moi chamativas ilustracións a base de recortes de xornais, tipografías, papeis pintados, retais... un colorido e suxestivo xeito de nos amosar estes animais que foxen do tradicional.

Collede o libro e viaxade por todos os continentes: seravos doado!

Premiado co Purple Island Award no Nami Island International Picture Book Illustrations Concours.