Orquídea negra

Neil Gaiman e Dave McKean compoñen en Orquídea negra publicado por ECC un cómic diferente, onde unha superheroína morre xa no inicio para recibir logo unha nova oportunidade converténdose nunha entidade vexetal. E o que podería ser algo máis ou menos "normal" dentro dos cómics de superheores e superheroínas vén a afastarse do camiño inicial polo ton que o autor impregna na obra, un ton místico e ao mesmo tempo ecolóxico que destaca polos debuxos que acompañan a este texto tan chamativo, tanto pola composición como pola cor. Asemade, chama a atención porque a páxina componse de tres columnas de viñetas rectangulares verticais que ser poden dividir en fragmentos ou facerse máis grandes e ter máis columnas. Este xogo continuo da disposición gráfica é unha das características da obra, sen dúbida.

Unha obra con moito texto no que atopamos melancolía, realismo, fantasía, poesía.... Aínda que a min, debo recoñecelo, non me encantou.

Jaybird

Este é un deses libros que compras "pola pinta". E abofé que é unha pasada o que nos presentan os seus autores, Lauri e Jaakko Ahonen en Jaybird, publicado por ECC ediciones. Un cómic gañador do Comic Book Finlandia de 2013 e do Kultahuippu (mellor obra ilustrada do ano) en 2012.

Con poucas palabras xa que a narrativa visual é fantástica, o libro combina temor e amizade e chama a atención sobre todo polas ilustracións, que a min, dende logo, téñenme fascinada. A historia narra a vida dun paxariño que coida da súa nai enferma e tirana nunha casa enorme. O seu único amigo é unha araña. Ventás e portas permanecen pechadas a cal e canto para que non entren os inimigos que poidan acabar con eles. O resto, o misterio. E a vosa imaxinación.