Recoñézoo: vino nun escaparate e merqueino. Nunca entrara nesa libraría pero chamoume tanto a atención esa portada... Ademais, vén asegurado polo selo editorial:
Lóguez.
La zapatilla roja é de Karin Grub e Tobias Krejtschi. E, teño que dicilo, quedo coas ilustracións. O texto gustoume menos do que agardaba: a verdade é que ao ler a contraportada maxinara outra cousa. Non está mal, pero non me acaba de convencer. Esta mesma historia contada doutro xeito... non sei, creo que rechía un pouco. Non me gusta o final, con esta contraposición sabida co primeiro mundo. Pola contra, coido que lle tira pouco partido ao conflito armado e ás súas consecuencias.
Aínda así, o álbum serve por suposto para falar das inxustizas e de quen son os máis prexudicados nas guerras. Un libro que non volve á realidade, esa que moitas veces queremos obviar. Asemade, o libro emociona e cuestiona, que é algo que debemos ter moi en conta. Destacan as ilustracións en gris con ese toque de cor vermella das zapatillas e o cambio que se produciría de cumprirse o desexo de felicidade e xustiza do protagonista-espectador: os conflitos non se solucionan con boas intencións, tal como aclaran as guardas do libro.
