Al otro lado

Na editorial La fragatina, álbum de Roberto Parmeggiani e Anna Forlati: Al otro lado fala da morte dun ser querido, un tema sempre difícile de tratar na infancia; neste caso o protagonista comprenderá a ausencia despois de preguntarse que significa a ausencia prolongada do pai e a tristura que o rodea.

Trenfugiados

José Campanari e Evelyn Daviddi son os artífices de Trenfugiados publicado pola Fragatina, un álbum que nos achega o drama que están a vivir millóns de persoas e que desta volta vén da man das voces infantís que reflexionan sobre o que poder supoñer quedar sen fogar e sen alimento, mentres deciden que a solidariedade é a única solución. Así, tanto o texto como as ilustracións fannos partícipes dunha soa mensaxe: que teñamos presente o sufrimento destas persoas e que tentemos poñernos no seu lugar para coñecer os seus sentimentos. Destaca a dozura tanto das palabras do texto como das ilustracións, de tal xeito que semella que nos conviden a participar coas nosas opinións, aínda que optemos polo silencio como o fai a propia avoa dos protagonistas, pero dándonos esa opción na escena final cunha chiscadela da nena dirixida ao lectorado que serve ademais para desdramatizar o texto.

Un sombrero fantabuloso

Pedro Mañas e Roger Olmos son os responsables de Un sombrero fantabuloso publicado pola Fragatina. Un texto cheo de fantasía e maxia, de persecución de soños, de cumprimento do traballo, que nos amosa que nunca debemos rendernos aínda que semelle ben difícil o que temos por diante. E xa sabedes que Roger Olmos é un dos ilustradores que máis me gustan, así que... que vou dicir das ilustracións! Son fantásticas e complementan perfectamente o texto que nos leva por unha viaxe onírica na consecución do perseguido, de procurar esa personalidade que se mantén oculta baixo un sombreiro cheo de misterio.

La vaca que leía libros

Adélia Carvalho e Till Charlier son artífices deste álbum que fomenta a lectura publicado pola Editorial La fragatina: La vaca que leía libros é unha historia preciosa -para quen ame a lectura- e divertida, xa que estamos a falar dun animal que quere ser culto, que non se conforma co seu destino e que será autodidacta; pero o seu esforzo verase recompensado grazas xa que será quen, mesmo, de transmitir o seu saber, algo que ata lle agradecerán aqueles e aquelas que exercen a nosa profesión.

En la azotea

Susanna Isern e Marjorie Pourchet crean En la azotea, publicado pola Fragatina un álbum sensible sobre o amor e o respecto á natureza, sobre a vida en liberdade e tras os barrotes, pero tamén da importancia da observacións e da empatía. Un libro que realmente nos convida a unha reflexión máis profunda sobre a importancia de ser un mesmo e poder acadar os nosos soños sen que ninguén queira cortar as nosas ás. Pero tamén é unha lembranza das distintas olladas que temos segundo os anos vaian pasando por nós e os prexuízos vaian facéndonos mella. Porque unha mirada infantil está dotada dunha perspicacia que a de maior pode faltar. A inocencia é favorecedora.

Piel de cocodrilo

A editora La Fragatina tráenos este fermoso álbum de José Carlos Román e Paolo Domeniconi inspirado nunha lenda africana: Piel de cocodrilo é unha historia tenra de amizade e de fomento da lectura, aínda que tamén é unha lección de humildade porque a soberbia acaba sendo mal conselleiro, así como lembrarnos que a beleza é tan efémera que non deberiamos darlle a máis mínima importancia. O libro tamén nos "explica" o porqué desa pel dos crocodilos... pero o mellor é a exaltación que nos fai da lealdade, que está por riba de momentos vaidosos e fútiles que só a verdadeira amizade sabe perdoar. E de paso, realiza un curioso chamamento ao amor polos libros e á lectura como punto de unión, xa que contos e historias realizan un labor fundamental.

O momento perfecto

Susanna Isern e Marco Somà presentan en O momento perfecto publicado pola Fragatina, un álbum tenro e doce onde todo é placidez, amabilidade, bonhomía e amizade. Aínda así, o libro consegue transmitir un certo misterio dende o principio, resolto ao final con certa sorpresa e con moita orixinalidade.

Por suposto, as ilustracións merecen unha mención especial, porque estamos ante imaxes que semellan poesía. Xulgade vós:

La montaña de coral

NiñoCactus e Tommaso D'Incalci son os artífices deste álbum que publica La Fragatina: La montaña de coral é unha fermosa fábula sobre acadar os propios soños, sobre a amizade, sobre o imposible posible. Destaca tanto a dozura do texto como a das ilustracións, en cores delicadas e lenes, como o propio desexo da montaña que soña ser máis alta para poder ver o mar.

La librería perdida

Aurora Ruá e Oscar Perales amosan o poder da lectura en La librería perdida, álbum ilustrado publicado pola Fragatina. Un lugar, unha moza, un misterio. A solución só se poderá topar nos libros, porque neles están todas as vidas, todos os lugares, todos os mundos. Só hai que comezar a ler... e o misterio estará resolto. Porque abrir un libro é adictivo, e dese mundo non hai volta posible. 

Proba e verás.

Tocar la luna

Mar Pavón e Luciano Lozano conseguen un traballo a destacar neste álbum ilustrado publicado pola editorial La fragatina: Tocar la luna é un libro que fala do tema da adopción con tenrura e ilusión, esa que nenos e nenas manteñen por teren unha familia, coa peculiaridade de que non é ata o final a substancia da narración.

Caras

André Letria e José Jorge Letria son os Caras que publica La Fragatina. Non é un álbum ilustrado, é un divertimento, un xogo lector, un libro que se enriquece en cada páxina xa que o lector, a lectora, pode formar ata catro mil caras combinando todas as posibilidades. Así, o libro non é o que semella, xa que podemos retroceder por arriba e avanzar por abaixo, ou pasar o do medio... diferentes expresións, diferentes cortes de pelo, bocas serias, bocas sorrintes... de todo hai. 16 caras e catro mil expresións. Xoguemos a ver se topamos algunha cara coñecida entre tanta posibilidade!

Tras mi ventana

Un álbum ben diferente é este que nos propón a editorial La fragatina: Tras mi ventana de Román Belmonte Andújar con ilustracións de Katie Harnett. Estas son evocadoras, con forza, e reforzan un texto case enigmático, adulto, que fala de decisións equivocadas, de reixas nas ventás, das concesións que nos ofrece a vida e dos roubos que nos chora.

El rey de los animales

Unha metáfora das ditaduras é o que nos ofrece este álbum publicado por Edicións La Fragatina: El rey de los animales é un libro de Miguel Tanco que fala de ditar leis egoístas, arbitrarias, fala da responsabilidade de quen ten poder para ditalas; as leis son necesarias, pero deben ser lóxicas e igualitarias, non deben realizarse para beneficiar a ninguén, tal como ocorre neste álbum. Dende a dedicatoria do autor-ilustrador comprendemos as súas intencións: "Para aquellos que no quieren mandar". Un álbum esencial para reflexionar sobre o poder, sobre como exercelo, e sobre a xustiza. Asemade, sobre as consecuencias que ten a desigualdade.

E todo isto, con humor. Un humor que caracteriza, abofé, ás ilustracións.

O rabaño

A editorial La fragatina publica na nosa lingua este álbum de Margarita del Mazo con ilustracións de Guridi aportándonos un novo punto de vista sobre como conciliar o sono. En O rabaño, as ovellas teñen unha vida moi doada, xa que non deben pensar nin saltarse o mandado, é dicir, comer, durmir... e axudar a durmir. Que é unha tarefa ben importante! E para axudar aos humanos, só hai que saltar en ringleira e coa numeración apropiada. Pero que ocorre cando unha se rebela, converténdose nunha ovella negra?

Los caminos de los árboles

Da editorial La fragatina é este álbum de Pep Bruno e Mariona Cabassa: Los caminos de los árboles é un libro cheo de dozura e poesía, desa poesía que convive connosco cada día e que ás veces nin vemos nin intuímos. Porque a poesía está, xustamente, nas persoas queridas. E estas serán as que nos dean eses pequenos momentos de felicidade que son os máis importantes para compoñer as nosas vidas. Con eles, con eses instantes, encheremos de comprensión e ledicia as nosas vidas.

Un pensamento cheo de vida. Unhas ilustracións que nos asologan de alegría.

"El abuelo miraba el atardecer mientras

el niño observaba el árbol.

- Abuelo - preguntó el nieto -,

¿tú crees que yo podría subir

a lo alto del ciruelo?..."

 

Las gafas de ver

Margarita del Mazo xunto con Guridi publican este divertido álbum en Edicións La fragatina: Las gafas de ver é unha lección para recordarnos que debemos mirar ben o que temos máis preto sen empeñarnos en mirar o inalcanzable tan só. Porque aquí ao noso carón agárdannos cousas marabillosas que podemos ocultar sen darlles oportunidade ningunha. Isto é o que significa o título do libro, procurémonos unhas gafas metafóricas que nos permitan ver as cousas sinxelas, as que temos preto e que cremos que son prescindibles porque estamos obnubilados antes o que está máis afastado, o que é inalcanzable e polo que loitamos innecesariamente.

Ilustracións e texto son un todo, un conxunto que sinala a forza e a unión que existiu entre os dous creadores á hora de realizar este libro.

Estrambólicos

Publica a editorial La Fragatina este estrambótico e divertido álbum que leva por título Estrambólicos de André Letria e José Jorge Letria. Estrambólicos é un libro para xogar e converter e reconverter a dezaseis personaxes combinándoos entre si. Múltiples posibilidades para explorar e descubrir novas criaturas. Porque habelas hailas, pero hai que topalas... neste libro!